Д-р сци. Сајковски: Рибиното масло е богато со витамин А и помага, го олеснува и забрзува процесот на регенерација на иритираната кожа

Кожата е заштитна обвивка која е основен телесен орган со функција уште од раѓање да го штити организмот од надворешното влијание на низа микроорганизми, но и хемиски физички штетни материи. Таа ја регулира телесната температура и размената на материи, особено на вода и минерали.

Кожата е заштитна обвивка која е основен телесен орган со функција уште од раѓање да го штити организмот од надворешното влијание на низа микроорганизми, но и хемиски физички штетни материи. Таа ја регулира телесната температура и размена на материи, особено на вода и минерали.

Пишува: Д-р сци. Александар Сајковски

Заради големата површина и нејзиниот директен контакт со околината и средината на живеењето, можно е да се појават бројни промени на истата кои имаат свое значење како за родителите така и за педијатрите. Затоа потребна е добра едукација во однос на тоа каква е нормалната кожа на бебето, за промени за кои може да се снајдат и да ги решат родителите сами, а за кои треба веднаш да се јават кај својот педијатар. Оваа едукација мора да се направи уште во породилиштето.

Основна карактеристика на кожата на новородено дете е дека таа е тенка, мека и како кадифе, а непосредно по раѓање лесно розова. Зависно од зрелоста на бебето може да биде делумно прекриена со бела како сирење прекривка која се губи инаку пред редовниот термин за породување. Кај предвремено родените деца постои поголема количина од овој заштитен бел слој, а кај пренесените деца воопшто го нема. Кај овие деца кожата е сува, се лупи, особено во делот на дланките и табаните. Со оглед дека ова лупење е промена која е минлива, по неа останува мека кожа која не бара никаков посебен третман.

Кожата е многу потенка и покомплексна кај бебињата, но и многу посензитивна на надворешните агресори и бара дополнителна грижа и заштита

Кожата на бебињата и децата значајно се разликува од онаа кај возрасните. Самозаштитните механизми кои ги има кожата на возрасните се многу послабо развиени кај децата, поради што за нив е потребна специјална нега и грижа. Таа е многу потенка и покомплексна кај бебињата, но и многу посензитивна на надворешните агресори и бара дополнителна грижа и заштита. Иако кожата кај бебињата ги има истите слоеви како и кај возрасните, секој слој е значително  потенок, крајно гледано кожата на бебињата е само 1/5 во однос на дебелината на кожата кај возрасните.

Најдалечниот слој на епидермисот познат како роговиден слој е многу потенок, а клетките се помалку цврсто спакувани помеѓу себе компарирано со онаа на возрасните. Потните и лојните жлезди се, исто така, помалку активни отколку кај возрасните, па на тој начин хидролипидниот филм (емулзија од вода и масти која ја покрива и штити кожата) и протективната киселина која е благо закиселена вода како дел од хидролипиднот филм се уште послабо развиени.

Регулацијата на телесната температура се разликува кај бебињата поради три основни компоненти: Површината на телото кај бебињата е голема во однос на нивниот волумен, поради што тие лесно губат топлина; Потните жлезди кај бебињата се послабо активни компарирано со возрасните, па затоа тие не можат да компензираат високи температури; Целата циркулаторна мрежа на крвни садови кај бебињата не е целосно формирана и затоа поспоро се адаптирааат на температурните промени со васкуларна констрикција или дилатација.


Како резултат на овие факти во однос на лимитираната бариерна функција на кожата кај бебињата, може да се заклучи:

  • Кожата на бебињата е помалку отпорна отколку кај возрасните и е посебно сензитивна на разни хемикалии, физички и микробни влијанија. Супстанците кои се во контакт со кожата кај бебето многу полесно може да се апсорбираат и да пенетрираат во подлабоките слоеви на кожата дури и во телото.
  • Кожата кај бебињата многу побргу се суши.
  • Кожата на бебињата е многу посензитивна на УВ зрачењата компарирано со возрасните. Сензитивноста кон УВ зрачењето е дополнително засилено поради послабата пигментација на кожата кај бебињата. Меланоцитите (клетки кои се одговорни за продукција на меланин) се присутни, но многу послабо активни.

Имајќи ги предвид сензитивноста кон УВ зраците, најдобра превенција за бебињата е користење на заштитни креми при изнесување на сонце. Но и покрај тоа можни се иритации, дури и изгореници на кожата под влијание на УВ зраците. Во овие случаи користењето на масти од рибино масло кое е богато со витамин А (Јекодерм маст) помага и го олеснува и забрзува процесот на регенерацијата на иритираната кожа и онаа која е оштетена од влијанието на УВ зрачење или на хемиските агенси. Таа дава глаткост и сјај на кожата и ја зголемува нејзината еластичност, а ја подобрува и епителизацијата на кожата.