Në informacionet më të fundit mbi variantet e COVID, Agjencia britanike e sigurisë shëndetësore (UKHSA) deklaron se në javën e 14 gushtit, nënvarianti BA.4.6 përbënte 3.3 për qind të të gjitha testeve pozitive në Britaninë e Madhe. Deri më sot, ajo është përhapur në 9 për qind të mostrave të renditura.
Gjithashtu, të dhënat nga Qendra amerikane për kontrollin dhe parandalimin e sëmundjeve (CDC) tregojnë se ky nënvariant tani përbën mbi 9 për qind të të gjitha rasteve të fundit të koronavirusit në SHBA. Varianti është identifikuar edhe në disa vende të tjera të botës.
ÇFARË DIHET PËR BA.4.6 DHE A DUHET TË SHQETËSOHEMI?
BA.4.6 është “pasardhës” i variantit BA.4 të omicron. Varianti BA.4 u zbulua për herë të parë në janar të këtij viti në Republikën e Afrikës së Jugut, prej nga ai u përhap në mbarë botën së bashku me variantin BA.5.
Nuk është plotësisht e qartë se si u shfaq nënvarianti BA.4.6, por është e mundur që ai të jetë variant i ashtuquajtur i rekombinuar. Rikombinimi ndodh kur dy variante të ndryshme të virusit SARS-CoV-2 infektojnë një person në të njëjtën kohë.
Dhe përderisa BA.4.6 është i ngjashëm me variantin BA.4 në shumë mënyra, ai ende mbart mutacion në proteinën spike në sipërfaqen e virusit, i cili e lejon atë të hyjë në qelizat njerëzore.
Ky mutacion, R346T, është parë në disa variante të tjera dhe shoqërohet me evazion të përgjigjes imune, që do të thotë se viruset me atë mutacion e kanë më të lehtë të shmangin antitrupat e krijuara nga vaksinimi ose infeksioni i mëparshëm.
ASHPËRSIA, INFEKTIVITETI DHE SHMANGIA E PËRGJIGJES IMUNE
Për fat të mirë, infeksionet me variantin omikron përgjithësisht rezultojnë në sëmundje më pak të rënda. Varianti omicron është më pak vdekjeprurës në krahasim me variantet e mëparshme të koronavirusit. Mund të presim që e njëjta të jetë edhe për BA.4.6. Deri më tani, nuk ka raportime që ky variant të shkaktojë simptoma më serioze.
Megjithatë, ne gjithashtu e dimë se nënvariantet e omicron janë më ngjitëse se ato të mëparshme. BA.4.6 duket të jetë edhe më i suksesshëm në shmangien e sistemit imunitar sesa BA.5, varianti aktual mbizotërues. Megjithëse ky informacion bazohet në studime që ende nuk i nënshtrohen rishikimit, pjesa tjetër e të dhënave e mbështesin këtë teori.
Sipas informacionit të UKHSA, vlerësimet e hershme sugjerojnë se BA.4.6 po përhapet më shpejt në fazat e hershme të infeksionit sesa varianti BA.5.
Megjithatë, kjo shpejtësi është padyshim më e ulët se ajo e variantit BA.5 në krahasim me variantin BA.2.
Universiteti i Oksfordit raporton se ata që morën tre doza të vaksinës origjinale Pfizer prodhuan më pak antitrupa në përgjigje të variantit BA.4.6 krahasuar me BA.4 ose BA.5, gjë që është shqetësuese pasi sugjeron se vaksinat kundër Covid mund të jenë më pak efektive në luftën kundër BA.4.6.
Aftësia e këtij nënvarianti për të shmangur përgjigjen imune mund të zvogëlohet disi nga vaksinat e reja përforcuese bivalente që sulmojnë në mënyrë specifike nënvariantet e omicron, përveç versionit origjinal të virusit SARS-Cov-2. Kjo do të bëhet më e qartë me kalimin e kohës.
