Dështimi i zemrës (insuficienca) është sëmundje mjaft e zakonshme dhe serioze për të cilën nuk ka një shërim definitiv. Bëhet fjalë për gjendje kur zemra nuk është e aftë të shtypë gjakun nëpër trup dhe të lejojë funksionimin e organeve të tjera. Organizmi nuk mund të lirohet nga produktet e metabolizmit, gjë që çon në akumulimin e lëngjeve në mushkëri dhe në pjesë tjera të trupit. Si pasojë, ndodhin ndryshime në zemër, për shkak të së cilave, në përpjekje për të plotësuar nevojat e organizmit, ndodh rritja e vëllimit të kavitetit të zemrës, duke rritur numrin e sulmeve në zemër dhe masën muskulore të zemrës. Dështimi i zemrës mund të jetë edhe akut kur ndodh për shkak të sëmundjes akute të zemrës, më së shpeshti gjatë sulmit në zemër.
Sëmundjet që dëmtojnë muskujt e zemrës çojnë në një gjendje të quajtur dështimi kongestiv kardiak.
Shkaqet për dështimin e zemrës më së shpeshti janë sëmundja koronare, infarkti miokardiak, sëmundje hipertenzive e zemrës, sidomos pacientë të cilët kanë tension jo të rregullt të gjakut, sëmundje të valvulave të zemrës, sëmundje kongjenitale të zemrës, inflamacion i muskulit të zemrës, kardiomiopat, personat me diabet.
Simptomat
- ndjesia e mungesës së ajrit;
- dobësimi i përgjithshëm dhe lodhje e shpejtë;
- ënjtja e këmbëve;
- fryrje dhe siklet në stomak;
- humbja e oreksit;
- vështirësi në frymëmarrje e cila intensifikohet gjatë natës;
- paaftësia e pacientit për të qëndruar i shtrirë, pasi që menjëherë shfaqet ndjesia e “urisë” për ajrin;
- kollitje dhe sekret;
- nevoja për urinim gjatë natës;
- paraqitja e simptomave në formën e harresës dhe përgjumjes (për shkak të ushqyerjes së keqe të trurit).
Diagnoza konfirmohet pas marrjes së anamnezës dhe ekzaminimit fizik të pacientit dhe kryerja e ekzaminimeve të veçanta, si elektrokardiogram, echo të zemrës, koronarografia ose RTG të kraharorit.
