Pothuajse një në pesë persona kanë efekte anësore afatgjata të COVID-19 dhe deri në pesë javë pas diagnozës fillestare, tregon një analizë e re e madhe në Britaninë e Madhe. Çdo i dhjeti person ka simptoma të COVID-19 edhe 12 javë pas diagnozës, ndërsa disa më gjatë.
Zyra Britanike për Statistikat Kombëtare publikoi informacionin paraprak nga raporti i saj mbi prevalencën e “COVID-19 afatgjate”, ndërsa doli se sëmundja te disa, lë pasoja që zgjasin me muaj.
Simptomat më të zakonshme të raportuara ishin lodhja, ndjekur nga kollitja, dhimbja e kokës, humbja e ndjenjës së nuhatjes dhe shijes, dhimbje fyti, temperaturë, gulçim, të përziera, diarre dhe dhimbje barku.
“Këto të dhëna paraprake janë shumë shqetësuese”, thekson Dr. David Strein, pedagog klinik në Fakultetin e Mjekësisë të Universitetit Exeter.
“Këto të dhëna gjithashtu ofrojnë pasqyrë në gamën e ndërlikimeve që shfaqen, për shembull, rrezikun e sulmit në zemër, sulmit në tru ose dështim të zemrës, i cili është pothuajse 12 herë më i lartë tek pacientët me COVID-19 sesa tek pacientët e shtruar në spital për infeksione të tjera. Mundësia e zhvillimit të diabetit ose dështimit të veshkave është 9 ose 10 herë më e lartë te pacientët me COVID-19”, theksoi Dr. Strein.
Raporte të tjera sugjerojnë që COVID-19 mund të shkaktojë çrregullime mendore, të tilla si ankth ose depresion, brenda tre muajve pasi personi të infektohet me koronavirus. Një nga problemet më të zakonshme neurologjike afatgjata të raportuara nga pacientët me COVID-19 është “mjegulla e trurit”, në të cilën njerëzit kanë vështirësi të përqendrohen dhe të mbajnë mend.
Megjithëse simptomat e përhershme mund të shihen në infeksione të tjera virale, zakonisht pas lodhjes virale ose kollës post-virale, efektet anësore afatgjata duket se janë shenjë dalluese e COVID-19. Ka shumë ide se pse SARS-Cov-2 shkakton komplikime kaq afatgjata, por nuk ka përgjigje përfundimtare.
“Megjithëse simptomat post-virale janë të zakonshme, qoftë pas gripit ose koronavirusëve të tjerë, shkalla e kësaj pandemie dhe numri i mundshëm i njerëzve të infektuar me një kovid tjetër janë të papara dhe përfaqësojnë një shkak tjetër të shëndetit publik të lidhur me COVID-19”, thanë ekspertët.
