Shkruan: Aleksandra Stojanovska / saska@panacea.mk
Kongresi i gjashtë i Shoqatës Maqedonase të Kardiologjisë do të mbahet në Ohër nga data 3 tetor deri më 6 tetor, në të cilin është planifikuar edhe pjesëmarrja ndërkombëtare e profesionistëve mjekësorë. Rreth asaj se cila do të jetë tema kryesore e Kongresit të ardhshëm dhe se çfarë mund të pritet prej tij, biseduam me Prof. Dr. Elizabeta Srbinovska-Kostovska, kryetare e Shoqatës Maqedonase të Kardiologjisë.
Prof. Srbinovska, për çfarë është i paraparë Kongresi i 6-të i ardhshëm i Kardiologjisë?
Prof. Dr. Srbinovska-Kostovska: Kongresi është i paraparë për kardiologët, specialistët e kardiologjisë dhe profesionistët e tjerë që punojnë në fushën e kardiologjisë, të cilët mund të marrin pjesë në tema të ndryshme nga mjekësia kardiovaskulare. Ky lloj shkëmbimi përvojash në nivel rajonal, europian dhe ndërkombëtar do të mundësojë monitorimin dhe zbatimin e misionit të Shoqërisë Europiane të Kardiologjisë, e cila gjithashtu është e pranuar nga shoqata jonë, ndërsa ajo është “që të reduktojmë ngarkesën e sëmundjeve kardiovaskulare”. Në të njëjtën kohë ky tubim profesional është gjithashtu një mundësi për shkëmbimin e përvojave mbi arritjet e fundit shkencore dhe profesionale në kardiologji dhe për të dëgjuar dhe takuar kolegë të rinj nga vendi dhe jashtë vendit.
Gjatë kësaj ngjarjeje profesionale do të mbahet edhe Kongresi i parë ballkanik i infermierëve dhe teknikëve
Cilat do të jenë temat kryesore që do të diskutohen me profesionalizëm në Kongres?
Prof. Dr. Srbinovska-Kostovska: Një nga temat kryesore të kongresit do të jenë teknikat e imazhit kardiovaskular, që janë një segment shumë i rëndësishëm në caktimin e diagnozës, prognozës, vendimin për trajtimin dhe monitorimin e sëmundjeve kardiovaskulare. Sëmundjet koronare dhe strukturore të miokardit të trajtuara me ndërhyrje perkutane, aritmitë kardiake dhe sëmundjet e arterieve periferike do të jenë tema që do të jenë gjithashtu në fokus të Kongresit Kombëtar të Shoqatës Maqedonase të Kardiologjisë. Sigurisht, edhe sëmundja arteriale koronare, dështimi i zemrës, kardiomiopatia, kardiologjia parandaluese, farmakoterapia, kirurgjia kardiake, kardiologjia pediatrike dhe sëmundje të tjera kardiovaskulare do të kenë vendin e tyre për prezantim dhe diskutim në këtë aktivitet profesional. Objektivat e çdo sesioni të kongresit do të jenë udhëzimet e fundit për trajtimin e sëmundjeve kardiovaskulare nga Shoqata Europiane e Kardiologjisë.
Çfarë parashikohet tjetër që të realizohet gjatë Kongresit?
Prof. Dr. Srbinovska-Kostovska: Kongresi do të përbëhet nga seanca plenare me profesionistë vendas dhe ndërkombëtarë, simpoziume, prezantime orale dhe me postera në fushën e mjekësisë bashkëkohore kardiovaskulare. Në të njëjtën kohë, gjatë kongresit, do të organizohen edhe disa sesione praktike.
A është Shoqata Maqedonase e Kardiologjisë e përkrahur nga asociacionet dhe shoqatat e huaja?
Prof. Dr. Srbinovska-Kostovska: Jam e lumtur që kongresi ynë do të mbështetet nga Shoqata Evropiane e Kardiologjisë. Ne planifikojmë sesione të përbashkëta të Shoqatës Maqedonase të Kardiologjisë dhe Shoqatës Evropiane të Kardiologjisë dhe Shoqatës Bullgare për Kardiologji – Grupi Punues për Gratë dhe Rrezikun Kardiovaskular. Ajo që dua të theksoj është se, gjatë kësaj ngjarjeje profesionale do të mbahet edhe Kongresi i parë ballkanik i infermierëve dhe teknikëve.
