Diabeti gjatë shtatzënisë, i njohur edhe si diabeti gestacional, shfaqet kur niveli i sheqerit (glukozës) në gjakun e një gruaje shtatzënë është shumë i lartë. Siç raporton “Klinika Majo”, ky lloj i diabetit diagnostikohet për herë të parë pikërisht gjatë periudhës së shtatzënisë, ndërkohë që shtatzëna nuk ka pasur kurrë problem me nivelin e sheqerit në gjak më parë.
Duke qenë se pasojat nuk janë aspak të padëmshme, mund të ndikojë negativisht në rrjedhën e shtatzënisë, si dhe në shëndetin e fëmijës. Por cila është mënyra më e lehtë për të kuptuar se një grua shtatzënë ka diabet gestacional?
Siç shpjegojnë gjinekologët, diabeti gjatë shtatzënisë nuk shkakton ndonjë shenjë apo simptomë të dukshme, gjë e cila mund ta vështirësojë diagnozën. Megjithatë, ata theksojnë se shumica e grave shtatzëna ende përjetojnë disa simptoma, ose dy prej tyre. Këto janë etja e shtuar dhe urinimi i shpeshtë.
Ekzistojnë disa shenja paralajmëruese që gjithashtu mund të shfaqen, por vetëm pak më rrallë. Kjo përfshin lodhje të shtuar, të përziera, probleme me shikimin, më konkretisht turbullim të shikimit dhe infeksione të shpeshta vaginale, fshikëz ose lëkurë. Nëse nuk njihet në kohë, diabeti gestacional mund të çojë në një rrezik të shtuar të zhvillimit të diabetit të tipit 2 tek fëmijët.
Përveç diabetit tek foshnja, pasoja të tjera të diabetit gestacional të pakontrolluar mund të jenë lindja e një foshnje të madhe (makrosomia), zhvillimi i keqformimeve kongjenitale, preeklampsi, aborti, maturimi i vonuar i organeve të foshnjës, veçanërisht i mushkërive dhe vdekja neonatale.
