Rrathët e zinj poshtë syve nuk janë gjithmonë shenjë e problemeve shëndetësore, ndoshta thjesht nuk keni fjetur mirë ose në familjen tuaj janë të trashëguara… Megjithatë, ndonjëherë lëkura në fytyrën tuaj mund të tregojë se mund të jetë koha për të folur me një profesionist.
LËKURA OSE BUZËT E THATA
Kjo është një shenjë e njohur e dehidrimit, që mund të zbulojë një gjendje shumë më serioze, të tillë si gjëndër tiroide jonormale ose diabet, thotë Dr. Roshini Raj, profesor në Universitetin NYU. Simptoma të tjera që mund të zbulojnë të njëjtat probleme janë etja intensive, urinimi i shpeshtë dhe shikimi i paqartë tek diabeti ose ndjenja e vazhdueshme e të ftohtit dhe lodhja tek problemet e gjëndrës tiroide.
RRITJA E QIMEVE NË FYTYRË
Simptomë e vezoreve policistike mund të jenë edhe qimet e padëshiruara, veçanërisht në mjekër ose sipër buzëve, por më pas duhet të kontrollohet niveli i hormoneve të ngritura.
Duke qenë se gjendja prek një numër të madh femrash, situata duhet të kontrollohet, por sigurisht shfaqja e qimeve në fytyrë nuk do të thotë gjithmonë se diçka nuk është në rregull, mund të jetë një predispozitë trashëgimore ose thjesht – procesi i plakjes.
PIKA TË VERDHA NË KAPAKËT E SYVE
Xanthelasmat janë formacione beninje të lëkurës që shfaqen për shkak të depozitimit lokal të lipoproteinave, por mund të zbulojnë rrezik të shtuar për zhvillimin e sëmundjeve të zemrës. Sipas një studimi mjekësor, u zbulua se njerëzit që kanë rritje të verdha në kapakët e syve kanë nivele të larta të kolesterolit, por ne e dimë se sa e rrezikshme është për zemrën…
RRATHËT E ZINJË TË SYVE
Sytë që duken të lodhur, qoftë për shkak të rrathëve të errët, qoftë për shkak ënjtjes, mund të jenë simptomë e alergjisë kronike. Dr. Raj shprehet se ndryshime të tilla mund të zbulojnë probleme me gjëndrën tiroide, por mund të jenë edhe pasojë e apneas së gjumit.
ASIMETRIA E FYTYRËS
Kjo mund të jetë një nga simptomat e para të sulmit në tru, thotë Dr. Leanna Wen, mjeke e urgjencës. “Pacientët shpesh e përshkruajnë atë si momentin kur u panë në pasqyrë dhe kuptuan se fytyra e tyre dukej ndryshe”, thotë ai. Ju gjithashtu mund të vini re se njëra anë e fytyrës është e mpirë dhe se keni probleme me të folurit. Meqenëse çelësi i trajtimit të suksesshëm të sulmit në tru është shpejtësia, nëse vëreni ndonjë nga këto simptoma, kërkoni menjëherë kujdes mjekësor.
PARAQITJA E ÇNGJYROSJES SË FYTYRËS
Edhe nëse janë ndryshime të lehta, ato mund të nënkuptojnë se diçka nuk është në rregull. Buzët e purpurta ose thonjtë e duarve mund të tregojnë probleme me zemrën ose mushkëritë, thotë Dr. Malika Marshall, mjeke interniste.
HUMBJA E QIMEVE
Humbja e qerpikëve mund të nënkuptojë alopeci, sëmundje autoimune që sulmon gjëndrën e qimeve. “Mund të kufizohet në një pjesë të caktuar të trupit, por mund të shfaqet në të gjithë trupin”, thotë Dr. Benjamin Burt, okulist, duke shtuar se trajtimi është i disponueshëm, por fatkeqësisht nuk ka kurë.
Të gjitha simptomat e mësipërme mund të zbulojnë disa gjendje të tjera, por nëse jeni të shqetësuar, sigurohuni që të konsultoheni me një mjek.
