Temperatura e lartë nuk është diçka e panjohur – të gjithë kanë përjetuar ethet në jetën e tyre, zakonisht shkaktuar nga një infeksion me baktere ose viruse. Megjithatë, me fillimin e pandemisë së koronavirusit, shumica prej nesh kanë filluar të pyesin se çfarë kuptimi kanë saktësisht leximet e termometrit dhe kur duhet të shqetësohemi.
Simptomat e infeksionit me koronavirus përfshijnë dhimbje koke, dhimbje të fytit dhe hundë të zëna, si dhe temperaturë të lartë. Analiza e të dhënave nga prilli i vitit të kaluar në një kampion prej 17 515 pacientësh me koronavirus tregoi se pothuajse 80 për qind e të rriturve dhe 46 për qind e fëmijëve kanë temperaturë të lartë pas infektimit me këtë virus. Në mesin e të rriturve që kishin ethe, 14.7 përqind kishin temperaturë shumë të lartë/ethe (39 gradë ose më shumë).
Është e rëndësishme të theksohet se jo të gjithë pacientët me COVID do të kenë ethe dhe se jo të gjithë ata që kanë temperaturë do të jenë pozitivë me koronavirus. Megjithatë, është një simptomë shumë e zakonshme.
Çfarë llogaritet saktësisht si ethe?
Sipas burimeve nga Biblioteka Kombëtare e Mjekësisë në SHBA, ethet teorikisht janë temperaturë trupore më e lartë se normalja. Temperatura normale e trupit ndryshon nga personi në person, por në përgjithësi qëndron brenda rreth 37 gradë.
Qendra Amerikane për Kontrollin dhe Parandalimin e Sëmundjeve (CDC) i konsideron ethet si temperaturë prej 38 gradë ose më lartë. Dhe ndërsa leximi i thjeshtë i temperaturës është mjeti më i mirë diagnostikues, CDC gjithashtu thekson se ethet mund të diagnostikohen nëse personi ndihet i nxehtë në prekje, raporton se ka ethe ose duket i skuqur.
Dr. Jill Grimes, mjeke e mjekësisë familjare, shton se ka edhe nivele të ndryshme të etheve, disa më serioze se të tjerat. Ethet e shkallës së ulët, për shembull, është term që përdoret për të përshkruar temperaturën trupore mbi normalen, por nën pragun e temperaturës. “Këtu po flasim për 37 deri në 38 gradë”, thotë Dr. Grimes, duke shtuar se në këto raste nuk bëhet fjalë për “ethe të vërteta”.
“Në përgjithësi, kur mjekët dëgjojnë se keni temperaturë mbi 38.3 gradë, atëherë ju ekzaminojnë më me kujdes, duke kërkuar një infeksion”, shpjegon doktori. Akademia amerikane e mjekëve amë shton se temperaturat prej 38.5 gradë dhe më të larta konsiderohen të larta dhe mund të tregojnë infeksion potencialisht të rrezikshëm, që do të thotë se pacienti ka nevojë për kujdes të menjëhershëm mjekësor.
Pse shfaqen ethet dhe si mund t’i vërejm?
Është e rëndësishme të theksohet se ethet nuk janë sëmundje në vetvete, por shenjë që trupi juaj po përpiqet të luftojë një sëmundje ose infeksion. Viruset dhe bakteret që shkaktojnë infeksione lulëzojnë mirë në trupin e njeriut në temperaturën normale të trupit. Temperatura është rezultat i përpjekjes së trupit tuaj për të vrarë patogjenin duke krijuar mjedis në trupin tuaj në të cilin ai nuk mund të mbijetojë. Ethet gjithashtu aktivizojnë sistemin tuaj imunitar, i cili është një përpjekje tjetër për të vrarë patogjenët.
Ethet manifestohen në mënyra të ndryshme në varësi të ashpërsisë së saj, thotë Dr. Matthew Mintz. “Ndjenja e nxehtësisë, skuqja, të ftohtit, dridhje, dhimbje trupi – të gjitha këto janë simptoma të zakonshme, por jo çdo pacient do t’i ketë të gjitha”, thotë Dr. Mintz, duke shtuar se ethet mund të jenë gjithashtu ciklike, që do të thotë se temperatura rritet dhe ulet. Kur temperatura e trupit tuaj ulet, mund të filloni të djersitni.
Megjithatë, historia për ethet mund të jetë e ndërlikuar, veçanërisht kur flasim për koronavirusin: në rastin e viruseve të tjera, siç është virusi i gripit, ka një periudhë të shkurtër nga hyrja e virusit në trup deri në shfaqjen e simptomave të tilla si ethet. – Kjo është zakonisht shenjë që ju duhet të qëndroni në shtëpi derisa të shëroheni.
Kur flasim për Covid-in, trupit i duhet pak më shumë kohë për të njohur infeksionin. “Kur infektoheni me koronavirus, disa simptoma, përfshirë ethet, nuk do të shfaqen menjëherë, por në dy javët e para dhe mesatarja është nga katër deri në gjashtë ditë”, paralajmëron Dr. Mintz. “Kjo do të thotë që ju mund të infektoheni me koronavirus për ditë të tëra dhe mund ta përhapni infeksionin, sepse nuk e dini se jeni sëmurë.”
Dr. Mintz shton se ndonjëherë ethet nuk janë ndër simptomat e para të infeksionit me koronavirus, ndërsa ndonjëherë nuk shfaqet fare: disa pacientë do të fillojnë të kolliten disa ditë para se të kenë ethe, ndërsa disa do të jenë plotësisht asimptomatikë.
