Infeksioni po afrohej gjithnjë e më shumë ne shtëpinë e tyre. Miqtë e tyre, shumica e kolegëve të tyre dhe ndonjëherë fëmijët apo gjyshërit e tyre u infektuan me koronavirus. Dukej se ishte çështje kohe para se lumturia të largohej nga ata që ende nuk e kishin “kapur” virusin.
Por disa njerëz kanë arritur të kalojnë shumë valë infeksioni, edhe gjatë varianteve më ngjitëse. Koronavirusi i kurseu ata në të dy vitet e pandemisë, të paktën në dijeninë e tyre.
Disa mendojnë se kjo është për shkak se ata kanë respektuar rreptësisht masat e përshkruara për të parandaluar infeksionin. Të tjerët se ishin thjesht me fat. Të tjerë pyesin nëse infeksioni i tyre ishte asimptomatik, veçanërisht në fillim kur testimi nuk ishte i përhapur.
KOMBINIMI I FAKTORËVE
Një arsye të vetme për të shpjeguar pse dikush nuk u infektua – nuk ka. Arsyeja është ndoshta një kombinim faktorësh. “Shumë hipoteza duken të besueshme,” tha Leif Eric Sander, kreu i Departamentit të sëmundjeve infektive dhe respiratore në Spitalin Charite në Berlin.
Mbi të gjitha, është e rëndësishme të kihet parasysh se shumë infeksione me koronavirusin kalojnë plotësisht ose kryesisht pa u vënë re.
GJENET DHE GRUPA E GJAKUT
Në një meta-analizë të botuar vitin e kaluar në revistën JAMA, autorët shkruan se afërsisht 40 për qind e njerëzve me diagnozë të konfirmuar të COVID-19 në kohën e testimit ishin asimptomatikë. Të dhënat bazohen në 95 studime ndërkombëtare që përfshijnë 30 milionë njerëz.
Frekuenca e testimit padyshim luan rol në zbulimin e infeksionit. Ata që nuk janë testuar rregullisht kanë më shumë gjasa të mos jenë në dijeni të një infeksioni të mundshëm të lehtë.
Gjenet gjithashtu mund të luajnë rol nëse dikush infektohet, thotë Ulf Dietmer, drejtor i Institutit të Virologjisë në Spitalin Universitar të Essenit.
“Ka njerëz që janë më të ndjeshëm ndaj malaries ose HIV për shkak të karakteristikave të tyre gjenetike. Në një farë mase, kjo vlen edhe për SARS-CoV-2”, tha ai, duke shtuar se e njëjta gjë vlen edhe për grupën e gjakut. Sepse nuk ndikon vetëm në ashpërsinë e sëmundjes, por edhe në ndjeshmërinë ndaj virusit.
Mbrojtja e ofruar nga vaksina shpesh nënvlerësohet. Megjithëse niveli i antitrupave zvogëlohet me kalimin e kohës, ai mbetet mjaft i lartë për muaj të tërë, gjë që, redukton numrin e infeksioneve, thekson Dr. Sander.
Dr. Dietmer shtoi se një nëngrup i veçantë i antitrupave ishte gjetur se ofron mbrojtje veçanërisht të mirë kundër infeksionit koronavirus. “Matja e niveleve të tyre është shumë e kushtueshme dhe e komplikuar, ndaj nuk zbatohet. “Kështu që ju nuk mund ta dini nëse dikush i ka ato apo jo.”
RRETHANAT APO RASTËSIA
Një fenomen tjetër që duhet përmendur është fakti se disa ditë pas infektimit me një patogjen, njerëzit zakonisht janë më pak të ndjeshëm ndaj infeksionit me dikë tjetër. Me fjalë të tjera, një ftohje e zakonshme mund të mbrojë kundër koronavirusit për ca kohë.
“Kjo është pjesërisht për shkak të interferoneve, proteinave mbrojtëse në mukozën që zvogëlojnë ndjeshmërinë e SARS-CoV-2 në atë dritare kohore”, thotë Dr. Sander.
Tek disa njerëz, sistemi imunitar arrin të eliminojë vetë virusin nga organizmi shumë shpejt.
JU NUK JENI TË SIGURT PËRGJITHMONË
Një studim suedez gjeti qeliza T (lloj i qelizave të bardha të gjakut që është pjesë e sistemit imunitar) te njerëzit që nuk ishin pozitivë pas kontaktit të ngushtë me anëtarët e familjes së infektuar. Kjo është shenjë se sistemi i tyre imunitar po ‘vepronte’ me virusin për t’u marrë me virusin SARS-CoV-2, megjithëse nuk mund të zbulohej gjithmonë,” tha Dr. Sander.
Dhe çfarë mund të konkludohet? Ndoshta e keni pasur virusin pa e ditur, ndoshta keni përfituar nga ndonjë rrethanë e përkohshme ose disa faktorë gjenetikë ose thjesht fat i çmendur.
“Asnjë nga këto nuk do të thotë se jeni përgjithmonë i sigurt. Një variant i ri i koronavirusit ose rrethanat e ndryshuara mund ta ndryshojnë plotësisht atë”, thekson Dr. Sander.
