Profesori Tim Spector, shkencëtari prapa aplikacionit britanik për monitorimin e simptomave të koronavirusit të ri, paralajmëron se virusi te disa njerëz me COVID-19 infekton më shumë pjesë të trupit dhe vepron si sëmundje autoimune.
Pacientët që vuajnë nga i ashtuquajturi COVID-19 “afatgjatë” për muaj me radhë pasi sëmuren informojnë për probleme të tilla si gulçim, lodhje kronike dhe “mjegull në tru”.
Studiuesit në King’s College London, të udhëhequr nga profesori i epidemiologjisë gjenetike Tim Spector në bashkëpunim me kompaninë e kujdesit shëndetësor, gjurmuan të dhënat e më shumë se katër milion njerëzve dhe zbuluan se efektet e virusit vazhdonin te një numër i konsiderueshëm i njerëzve. Studimi zbuloi se simptomat e “COVID-19 afatgjatë” janë të pranishme për një muaj në një në 10 pacientë dhe të paktën tre muaj më vonë një në 50 pacientë vuan ende.
Është përcaktuar se “COVID-19 afatgjate” prek më shpesh pacientët që janë në moshë pune, mosha mesatare në mesin e pacientëve është 45 vjeç, ndërsa në raste të rralla ndodhja vërehet tek njerëzit e moshuar mbi 65 vjeç dhe më të rinj se 18 vjeç. Gratë janë më të ekspozuara ndaj ndikimit më të madh të “COVID-19 afatgjate” krahasuar me burrat.
Prof. Spector thotë se në muajt e parë të pandemisë, vëmendje e vogël u ishte kushtuar pacientëve të infektuar që nuk ishin aq të sëmurë sa të shtroheshin në spital, gjë që ishte rasti në 99 përqind të rasteve. Ai thotë se COVID-19 është treguar jo vetëm grip më i rëndë, por në shumë pacientë vepron si sëmundje autoimune që sulmon sisteme të shumta në trup.
“Studiuesit kanë zbuluar se shumë njerëz nuk ndihen më mirë edhe dy javë pas shfaqjes së simptomave, ashtu siç pritej. Ata vazhduan t’i ndiqnin ata dhe kështu zbuluan se një përqindje e madhe e njerëzve i ndjenë problemet edhe muaj më vonë”, tha prof. Spector.
“Kjo është ana tjetër e COVID-19,” përfundoi profesori, duke shtuar se sëmundja afatgjate mund të provojë të jetë problem më i madh i shëndetit publik sesa numri i madh i vdekjeve nga COVID-19.
