Simptomat e koronavirusit të ri SARS-CoV-2 prekin pothuajse çdo pjesë të trupit, nga koka te gishtat e këmbëve. Por studimi i ri konfirmon hulumtimin e mëparshëm duke sugjeruar se një nga simptomat më të zakonshme janë ethet.
Në një studim të botuar disa ditë më parë në The Journal of Emergency Medicine, shkencëtarët publikuan rezultatet e një studimi të gati 12 000 pacientëve të testuar për COVID-19 në New York.
Në atë grup, simptomat më të zakonshme që ndoqën testin pozitiv të koronavirusit ishin: ethet – 74 përqind, gulçim – 68 përqind, kollitja – 65 përqind.
Një studim i fundit spanjoll me më shumë se 12 000 njerëz të shtruar në spital për koronavirus zbuloi se 86 përqind kishin ethe, 76 përqind kolliteshin dhe 60 përqind kishin vështirësi në frymëmarrje.
Një studim i mëparshëm i pacientëve me COVID-19 të shtruar në Kinë zbuloi se 99 përqind kishin ethe, 70 përqind raportuan lodhje dhe 59 përqind kishin kollë të thatë.
Por ethet janë reagimi i zakonshëm ndaj shumë viruseve, pasi sistemi imunitar rrit temperaturën e trupit në përpjekje për të mbrojtur veten dhe shkatërruar “sulmuesin”.
Për shkak se kjo simptomë shoqërohet kaq shpesh me COVID-19, shumë institucione kanë futur matje të temperaturës në dyert hyrëse për t’u përpjekur të frenojnë përhapjen e virusit.
Sidoqoftë, fakti që nuk keni ethe nuk do të thotë domosdoshmërisht se nuk jeni të infektuar me koronavirus.
Disa infeksione mund të shoqërohen me temperaturë të lehtë ose aspak. Rreth 40 për qind e infeksioneve të koronavirusit nuk mund të shkaktojnë kurrë simptoma, duke lejuar që njerëzit që nuk janë të vetëdijshëm se janë të sëmurë të transmetojnë pa dashje COVID-19 tek të tjerët për disa ditë.
