Gratë mbi moshën 55 vjeçare që janë diagnostikuar me lloje të caktuara të kancerit të gjirit në një fazë të hershme mund t’i nënshtrohen operacionit dhe më pas terapisë hormonale, thanë autorët e studimit.
Udhëheqësi i hulumtimit, Prof. Timothy Whelan nga Universiteti McMaster në Kanada e quajti zbulimin “të shkëlqyer”, sepse tregon se disa gra mund të shmangin me siguri rrezatimin dhe efektet anësore të tij.
Studimi, i prezantuar në takimin vjetor të ASCO (Shoqata amerikane e onkologjisë klinike) në Çikago, shqyrtoi rezultatet e grave me kancer të gjirit të tipit L të shkallës së ulët, kancer me shënues gjenetik specifik.
Një grup prej 500 pacientësh iu nënshtruan operacionit për kancerin e gjirit dhe më pas morën terapi hormonale. Më pas u ndoqën pesë vjet për të vlerësuar nëse kanceri i gjirit po kthehej.
Studiuesit zbuluan se shkalla e përsëritjes ishte vetëm 2.3 për qind pa rrezatim. Kjo është e krahasueshme me 1.9 përqind të rikthimeve në kancerin e gjirit të patrajtuar.
Prof. Whelan thotë se në fazat e hershme të kancerit të gjirit, radioterapia zakonisht jepet për tre deri në pesë javë për të zvogëluar rrezikun e rikthimit.
“Këto gjetje janë të shkëlqyera sepse ne kemi identifikuar një grup specifik pacientësh që mund të shmangin radioterapinë dhe efektet anësore, gjë që hap potencialin për praktikë më të mirë mjekësore në trajtimin e kancerit të gjirit”, tha ai.
“Radioterapia ka efekte anësore të mëdha, duke përfshirë lodhjen, rraskapitjen dhe acarimin e lëkurës dhe këto mund të zgjasin me javë pas përfundimit të ciklit, por ka efekte anësore të mëvonshme që ndikojnë në cilësinë e jetës, si dhe komplikime serioze shumë të rralla si: sëmundje të zemrës dhe lloje të tjera të kancerit”.
“Nëse mund të shmangim radioterapinë, më mirë, sepse jo të gjitha kanceret kërkojnë të njëjtin nivel terapie shpesh invazive”, tha Prof. Whelan.
