Оваа година, Светскиот ден против дебелината – 11 октомври е насочен кон подигање на свеста за преваленцата, сериозноста и разновидноста на стигмата на килограмите (телесната тежина). Според Светската федерација за борба против дебелината, стигмата се случува во широк спектар на поставки, при што медиумите се идентификувани како еден од главните причинители. Моменталниот медиумски приказ на дебелината ги засилува неточните и негативните стереотипи за телесната тежина што може да доведе стигма на килограмите. Федерацијата при тоа, упати повик до сите медиуми во светот да престанат да користат стигматизирачки јазик и слики, и наместо тоа, дебелината да ја прикажат на фер, точен и информативен начин.
Мотото на одбележувањето на денот е „Крај на стигМата на тежината“.
Што е стигма на килограмите?
Стигмата на телесната тежина се однесува на негативни однесувања и ставови кои се насочени кон поединци единствено поради нивните килограми. Доколку сакаме да ставиме крај на стигмата на килограмите, велат од Федерацијата, важно е да се прилагоди речникот и ставовите, да се подигне свеста и да се подобри општото знаење за нејзиното големо влијание. Фокусирајќи се на стигмата на овој Светски ден против дебелината, експертите велат дека мора да им се помогне на луѓето да ги надминат бариерите што произлегуваат како резултат на стигмата, што всушност ги спречува да го побараат и да го добијат потребниот медицински третман.
Дебелината во Меѓународната класификација на болести се дефинира како болест при која доаѓа до прекумерно таложење на масно ткиво во организмот, што е последица на тоа со храната да се внесува повеќе енергија отколку што може организмот да ја потроши.
Во Европа над половина од лицата постари од 18 години имаат прекумерна телесна маса и тежина (57,4 %). Мажите, во однос на жените имаат поголем проблем со вишокот килограми. Но, она што загрижува е податокот дека дебелината веќе не е проблем само на возрасните лица, туку дека таа се јавува во се поран животен период и носи долгорочни сериозни последици за здравјето на децата. Седечкиот начин на живот, намалената телесната активност, храната богата со енергија, засладените пијалаци, сите тие се причинители кои доведуваат до развој на прекумерна телесна маса и дебелина, како кај возрасните, така и кај децата.
