Организиран секоја година на 12 мај од страна на Меѓународниот совет на медицински сестри (International Council of Nurses), Интернационалниот ден на медицинските сестри го слави нивниот придонес во општествата ширум светот. Датумот има многу силно значење, бидејќи е роденден на најпознатата медицинска сестра во светот, Флоренс Најтингејл.
Најтингел е родена во Фиренца, Италија, на 12 мај 1820 година. Цел живот се борела за унапредување на својата професија и правата на жените. По завршувањето на школувањето се пријавила за заминување во Турција, каде што заедно со уште 38 медицински сестри се грижела за ранетите војници. Тоа била првата група жени кои заминале како медицински работници на фронт.
Флоренс Најтингел се смета за пионер на модерното сестринство во светот. Иницирала стручно образование на медицинските сестри и вовела методи за нега на пациенти и организација на болници, кои се прифатени во многу земји.
Меѓународниот ден на медицинските сестри се прославува во целиот свет за да им се оддаде почит за нивната неверојатна работа
Во Кримската војна, во средината на 19-тиот век, Флоренс ги организирала болниците во британскиот корпус и значително ја реформирала медицинската служба и негата на повредените и болните. Благодарение на ова, смртноста во британските теренски болници била намалена од 40 на 2 отсто. Таа го отворила и првото училиште за медицински сестри, а нејзините ученици потоа отвориле исти такви школи низ целиот свет.
Во предвечерието на Денот на медицинските сестри со своја порака се јавија и македонските медицински сестри, кои алармираат дека Македонија се соочува со недостиг од овој кадар и апелираат да се запре одливот на сестри. Пораката ја упатија на вчерашната Свечена академија во Скопје.
„Нашиот апел од денешната Свечена академија е да се запре одливот на медицински сестри. Бројките во Македонија не соодејствуваат со европските стандарди бидејќи има 350 сестри на 100 илјади жители, а во Европа нормите се над 600 медицински сестри на 100 илјади жители. Затоа велиме дека Македонија се соочува со недостиг од сестри“, се вели во изјавата на Гордана Бешлиовска, координатор на Унијата на здруженија на медицински сестри, кои се залагаат за подобрување на условите за работа на медицинските сестри, како и зголемување на нивните плати.
