14 ЈУНИ – СВЕТСКИ ДЕН НА КРВОДАРИТЕЛСТВОТО: Каде, како и кој може да дарува крв

Доброволното дарување крв е гест со кој имате можност да помогнете некому во неволја, па дури и да спасите живот. Постапката не е комплицирана, а во Македонија тоа може да го направите целосно бесплатно на многу места и пунктови.

14 ЈУНИ – СВЕТСКИ ДЕН НА КРВОДАРИТЕЛСТВОТО

Ако се уште не се дарувале крв, сигурно имате многу прашања за тоа како, каде и зошто доброволно да дадете крв. Ние за вас, ги пронајдовме одговорите на најчесто поставуваните прашања за оваа постапка.

КАКО СЕ ДАРУВА КРВ?

Пред дарувањето потребно е да пополните прашалник со прашања кои се однесуваат на вашето здравје, прележани болести и животни навики. Неопходно е искрено да одговорите нив бидејќи на тој начин го штитите сопственото, но и здравјето на тој што ја прима вашата крв. Со боцкање на прст се зема крв за да се исконтролира нивото на хемоглобин во крвта. Потоа лекарот ви мери крвен притисок и ја проверува работата на срцето. Актот на дарување се изведува во лежечка положба, со безболен убод на игла во вена од страна на стучен и обучен персонал.

Крв може да дарува секое здраво лице на возраст од 18 до 65 години. Во Македонија мажите може да даруваат крв на секои три, а жените на секои четири месеци.

КОЛКУ ДОЛГО ТРАЕ ДАРУВАЊЕТО КРВ?

Дарувањето крв од моментот на боцкање во вена трае до 10 минути. Целосно, оваа постапка може да ви одземе максимум 30-тина минути од вашето време.

ШТЕТИ ЛИ НА ЗДРАВЈЕТО?

Дарувањето крв не му штети на здравјето, доколку се спроведат сите пропишани постапки. Здравиот организам на дарителот многу брзо и во целост ја надоместува количината и сите составни делови на даруваната крв и тоа 24 часа. Крвните клетки (еритроцити, тромбоцити, леукоцити) се надоместуваат постепено во текот на неколку недели, во зависност од видот на клетките.

ДАЛИ ЌЕ МИ БИДЕ ДОБРО ПО ДАРУВАЊЕТО?

Вообичаено дарителите не чувствуваат никакви потешкотии или промени за време на или после дарувањето. Некои дарители се чувствуваат дури и подобро и олеснето од колку пред дарувањето. Сепак, незначителен број на дарители може да почувствуваат лесна непријатност или мачнина. Тоа не треба да ве загрижува, зашто таквите појави се минливи и без последици. Најчеста причина за тие нуспојави се умор и ненаспаност пред дарувањето.

МОЖЕ ЛИ ПРЕКУ ДАРУВАЊЕТО ДА СЕ ЗАРАЗАМ СО НЕКОЈА БОЛЕСТ?

При процесот на дарување не постои можност за зараза. Целиот прибор што се користи за земање крв, како што се игли, пластични ќеси и остантиот материјал, се стерилни и се користат еднократно. Повторно користење на сетот за дарување е оневозможено.

ЗОШТО ПО ДАРУВАЊЕТО НЕ СМЕЕ ДА СЕ ПУШИ?

Една од поретките непријатни реакции на организмот на пушењето е краткотрајно притискање на крвните садови во мозокот. Доколку веднаш по дарувањето пушите, неретко може да дојде до појава на вртоглавици, мачнини и малаксаност. Не смеете да запалите цигара најмалку 30 минути до два часа по постапката, а алкохол не смее да консумирате најмалку во наредните осум до 12 часа. Пожелно е дента кога сте дарувале крв, да пиете повеќе вода и течности.

КОГА МОЖЕ ДА ДАРУВАМ КРВ?

Крв може да дарувате најблизу до вашето место на живеење, а вработените крв може да даруваат и во деновите кога мобилни екипи на Институтот за трансфузиона медицина  доаѓаат во нивната работна организација. Доколку сакате, може да дарувате крв и во трансфузиолошката служба во вашиот град каде ќе бидете со задоволство пречекани и услужени. Секој работен ден од 7:30 до 19:00 часот, а сабота од 9:00 до 14:00 часот крв може да дарувате и во Институтот за трансфузиона медицина во Скопје.