Пекарските производи, брзата храна и газираните пијалаци често се богати со празни калории, односно содржат многу шеќери и неквалитетни маснотии, малку влакна, минерали и витамини. Таквите производи многу брзо ќе ви го зголемат нивото на шеќер во крвта, но брзо и ќе го намалат што ќе резултира со губење енергија и чувство на умор и немање волја. Загрижувачки е што консумирајќи такви продукти за појадок, можеме да внесеме повеќе од половина на дневно препорачаната количина шеќер. Се поставува прашањето тогаш, кои се тие квалитетни продукти кои треба да ги консумираме за појадок.
Житарките од цело зрно, ферментираните млечни производи како јогурт, кефир, овошјето и зеленчукот ќе ви дадат се што ви е потребно за разбудување и одржување на дотокот на енергија преку целото утро. Сложените јаглехидрати што се наоѓаат во таквите продукти, одржуваат констатно ниво на шеќерот во крвта кој е неопходен за правилно функционирање на мозокот и на мускулите, додека минералите и витамините ќе ви помогнат да биде поконцентрирани, побрзо и поефикасно да паметите, а физичките активности во слободно време ќе ги извршувате со доволно енергија.
На кој начин да подготвите брз, квалитетен и евтин појадок?
Појадокот е оброк што често го прескокнуваме бидејќи сакаме подолго да спиеме или наутро немаме волја, а понекогаш и време дури да си подготвиме и брз појадок. Квалитетниот појадок не мора да биде ниту сложен, ниту скап и најдобро е да си го подготвите дома. Наполнете го фрижидерот со свежо овошје и зеленчук, одберете најквалитетно млеко или можеби некој био напиток од бадем, ориз…, а квалитетните житарки ќе ви обезбедат енергија за цел ден. Оброкот може и да си го подготвите од вечер.
