Хемороидите се болни проширени вени во долниот дел од анусот и ректумот. Најчестите причини за создавање на хемороидите се: напрегањето, констипацијата, потоа генетските фактори, стареењето, прекумерната тежина, подигнувањето тешки предмети, долготрајната дијареја, долготрајното седење…
Симптомите можат да вклучуваат крвавење при одење во тоалет, болно отекување и болка околу анусот. Целото подрачје е чувствително, болно и чеша.
За да си олесните во оваа ситуација и за да спречите појава на хемороиди пијте големи количества вода, исхраната мора да биде богата со влакна, овошје и зеленчук, а столицата редовна. Затоа што здравата исхрана ќе ви овозможи помека столица со што празнењето на цревата е олеснето, а се намалува и притисокот, кој кога е зголемен резултира со создавање хемороиди. Исто така, одбегнувајте кревање тешки предмети и долготрајно седење. Ако често сте жртва на оваа непријатна и болна појава, во понудата, односно битката со неа имате многу противхемороидални креми или чепчиња кои можат да ви помогнат во намалувањето на отоците и болката.
Можете да се обидете и со ароматерапија. Корисно е капење во топла када или примена на седечки бањи (неколкупати на ден) со чиста, топла вода во која се препорачува додаток од десет капки масло од бергамот. Зголемете го внесот на биофлавоноиди така што ќе консумирате повеќе цитруси, грејп, зрнесто овошје и житарки. Ако сакате набрзина да си ја олесните болката или чешањето добро ќе дојде и мраз, но никогаш не го нанесувајте директно на болното подрачје, туку завиткајте го во чист пешкир.
