Научниците од Универзитетот Лом Линд (САД) пронашле врска меѓу консумирањето нездрава храна и менталните пореметувања, а дел од истражувањето е објавен на страницата „Медикал експрес“. За време на експериментот научниците анализирале податоци добиени од повеќе од 240 000 анкетирани (анкетирањето било спроведено меѓу 2005 и 2015 година), и тоа во рамки на повеќегодишното истражување на здравствената состојба во Калифорнија. Стручњаците откриле дека личностите кои во исхраната користат повеќе нездрава, брза храна почесто пријавувале ментални пореметувања во споредба со оние кои се хранеле поздраво.
Лекарите дошле до заклучок дека речиси 17 отсто од испитаниците патат од ментални пореметувања, од кои 13,2 отсто се умерени, а 3,7 отсто тешко ментално болни личности.
Утврдено е дека зголемувањето на внесот на шеќер е поврзано со биполарното пореметување, а дека консумирањето на обработени житарки и пржена храна, која содржи големо количество шеќер, е поврзано со депресијата.
„Ова, како и низа други истражувања, може да биде мошне важно за терапијата во областа на бихејвиоралната медицина“, истакнал професор Џим Бант, кој го предводел истражувањето.
Според неговите зборови, дојдено е време кога лекарите мораат внимателно да го проучат влијанието на храната врз менталното здравје. Меѓутоа, за да се даде конечен одговор на ова прашање, потребно е да се извршат дополнителни истражувања, додал Бант. Тој заклучил дека резултатите од анализите се приближни на резултатите на сличните истражувања кои се спроведени во други земји.
