(А.Т.) /aleksandra@panacea.mk
Речиси 50 лекции од 30 предавачи од целиот свет – бројка достојна за почит, но и сосема доволна за да го задржи вниманието на учесниците во 36. Светски конгрес на Интернационалното здружение за прочистување на крвта, што во изминатите четири дена се одржуваше во МАНУ, а во организација на Македонското здружение за нефрологија, дијализа, трансплантација и вештачки органи.
Впечатоците по завршувањето на настанот се позитивни. Многу повеќе и од она што го очекувавме. Навистина се постигна повеќе од очекувањата. Задоволни сме и од дискусиите, посетата, одлично се снајдовме и со социјалниот момент. Очекувавме дека ова светско чудо, овој светски конгрес, нормално дека треба да биде нешто најдобро, но не знаевме до каде ќе оди да биде најдобар и мислам дека ја исполнивме саканата цел, е заклучокот на првиот човек на конгресот, проф. д-р Спасовски, кој уште истакна и дека особено му е драго што речиси сите учесници на крајот биле одушевени од македонската гостољубивост, од тоа што овде сите се смеат, сите веднаш им приоѓаат и помагаат за се што им треба. Вели, тоа, на негово огромно задоволство, бил нивниот општ впечаток.
„На конгресот имаше 48 лекции од 30 предавачи од Јапонија, САД, Индија, Кина, Чешка, Белгија, Турција… Во однос на учесниците искрено досега не сме имале ваков конгрес, имаше околу 170-80 регистрирани учесници и суви котизации околу 135-140. Овој светски конгрес се прави прв пат во Македонија, ама прв пат сите беа задоволни во однос на посетеноста затоа што полна сала не се гледа секогаш, ние постојано имавме две третини полна сала“, додава проф. д-р Спасовски, кој инаку е поканет и избран за член на советот на интернационалното здружение за прочистување на крвта.
Бројката на присутните за време на предавањата всушност е одраз на нивниот квалитет, а токму на тој дел организаторите на 36. Светски конгрес на Интернационалното здружение за прочистување на крвта се особено горди.
„Имаше вкупно 12 сесии, еден симпозиум за континуирана медицинска едукација имаше три мини симпозиуми и четири постер-сесии, паралелно во две сали. Тоа значи многу презентери, сите дојдоа освен еден поради оправдани причини. Морам да кажам и дека квалитетот на предавањата зачудувачки беше на многу високо ниво, но не само од оние од кои очекувавме, како Белгија, Индија, САД, туку и од соседните земји. Многу издржани предавања. Морам да нагласам дека истото важи и за Македонија, ќе ги пофалам професор Спасовски и професор Ѓулшен Селим, навистина издржани предавања со свои резултати. Мислам дека предавањата навистина ги натераа слушателите да бидат присутни бидејќи сакаат да научат и беше атракција. Се зборуваше за сите можни техники и најновите достигнувања во светот, а исто така, имаше и многу практични аспекти и оние што ги кажаа предавачите, но и потоа бидејќи дискусијата беше многу плодна. Многу практични аспекти коишто на сите нас, лекарите, ќе ни послужат во она што ни е цел – да го подобриме начинот на лекување на пациентите и со тоа, се разбира, да им го продолжиме животот. Мислам дека тоа не направи многу среќни и задоволни“, вели д-р Оливера Стојчева-Танева, потпретседател на конгресот.
Во рамките на настанот се одржаа и курсевите за КМЕ на ЕРА-ЕДТА (Association of European kidney specialists/Асоцијација на Европски нефролози и ISN (The International Society of Nephrology) Интернационално здружение за нефрологија, а учесниците добија европски – УЕМС (Union of European Medical Specialists) акредитирани бодови за учество, во земјава препознаени со еквивалентност.
