Скопје, 30 март, 2020 – Вкупно 49 пацинети во моментов се хоспитализирани како последица на заболување од КОВИД-19, од кои седум се со потешка клиничка слика, односно имаат развиено пневмонија на белите дробови.
Вчерашниот биланс на новозаразени од коронавирус е 18, со што бројката на досега дијагностицирани пациенти изнесува 259, од кои тројца се излекувани, додека шестмина се починати.
Според вчерашната изјава на министерот за здравство Венко Филипче, за период од 2 до 3 дена потенцијално 7 пациенти ќе може да бидат пуштени на домашно лекување.
“Оваа недела ќе бидат отворени уште 2 пункта за тестирање во Скопје, како и дополнително по 1 до 2 пункта, согласно големината на здравствениот дом или болницата и во останатите градови во земјава. Новиот пункт во Поликлиниката Чаир ќе почне да работи од денес, додека во Поликлиниката Млин Балкан до крајот на оваа седмица. Подготвен е и системот за мобилни тестови, кој ќе наредниве денови ќе почне да се применува во Скопје“, истакна на редовната прес конференција, министерот Филипче.
Во насока на превентивни мерки, Комисијата од Министерството го заврши увидот во сите (освен една) приватни институции, врз основа на што ќе се направи план за искористување и на тие капацитети, а Фондот за здравствено осигурување ќе изнајде модел на соработка.
Според местото на живеење, досега случаи на КОВИД-19 се регистрирани во: Скопје – 145, Дебар – 46, Куманово – 21, Штип- 14, Прилеп – 8, Велес – 6, Тетово – 5, Струга- 5, Охрид – 3, Кавадарци – 2, Гостивар – 1, Битола – 1, Гевгелија – 1, Струмица – 1.
