Мајмунските сипаници се ретка болест предизвикана од вирус. Спаѓаат во категоријата вируси како и големите сипаници, иако мајмунските сипаници предизвикуваат многу помалку тешки болести. Тоа е вирусна зооноза, што значи дека се пренесува од животни на луѓе, а потоа од човек на човек.
КАКО МОЖЕ ДА СЕ ЗАРАЗИТЕ?
Мајмунските сипаници се шират со близок контакт. Според Американскиот центар за контрола и превенција на болести (ЦДЦ), тоа значи дека може да се пренесат преку оштетена кожа, дишни патишта или слузница, како што се очи, нос или уста. Најчестите начини на зараза со мајмунски сипаници се:
- Низ големи респираторни капки. “Капките од дишните патишта општо не може да патуваат повеќе од неколку метри, па потребен е продолжен контакт лице во лице“, наведува ЦДЦ.
- Директен контакт со телесни течности или лезии.
- Контакт со контаминирана облека или постелнина.
ЦДЦ мината недела предупреди дека, иако секој може да добие мајмунски сипаници, болеста се шири глобално помеѓу хомосексуалците и бисексуалните мажи. Но, мајмунските сипаници не се полово пренослива болест.
“Секој може да пренесе мајмунски сипаници со контакт со телесна течност, рани или респираторни капки кога е во нечија близина“, вели д-р Џон Брукс, главен медицински директор на Одделот за превенција од ХИВ/СИДА при ЦДЦ.
Официјални лица велат дека општиот ризик за зараза со мајмунски сипаници е мал.
СИМПТОМИ НА МАЈМУНСКИ СИПАНИЦИ
Кај лицата со мајмунски сипаници може да се развие треска или отекување на лимфните јазли. Чести се и главоболка, исцрпеност и болки во мускулите.
Еден од карактеристичните знаци на инфекција е осип на лицето или телото кој се претвора во испакнати јазолчиња кои стануваат меурчиња.
Лицето со мајмунски сипаници се смета дека е најзаразно додека има осип. Болеста може да трае две до четири недели, а повеќето лица се опоравуваат без лекување. Периодот на инкубација може да биде седум до 14 дена, велат од ЦДЦ.
Исто така, лице со мајмунски сипаници може да биде заразно од еден ден пред да се развие осип до 21 ден по појавата на симптоми.
