Холестеролот е присутен во секоја жива клетка на човекот и животните, бидејќи е есенцијален метаболит,а најмногу е застапен во храната од животинско потекло. Тој е составен дел на клеточната мембрана, учествува во метаболичките процеси во размена на материите, служи за синтеза на хормоните на кората на надбубрежната жлезда и половите хормони, како и за витамините растворливи во масти и за синтеза на витаминот Д. Прекурсор е на жолчните киселини што служат при дигестија и апсорпција на мастите. Ако нивото на холестерол е покачено, тие стануваат ризик фактор за развој на кардиоваскуларни заболувања. Меѓутоа, тоа е и супстанца неопходна за правилно функционирање на организмот.
Хиперлипидемијата или покачените маснотии во крвта може да се поделат на неколку начини. Со оглед на промените во метаболизмот на мастите се поделени на примарни и секундарни. Примарните се предизвикани од вродени наследни грешки во метаболизмот на мастите во организмот, од кои најважна е фамилијарна хиперхолестеролемија. Секундарните хиперлипидемии се јавуваат како несакан ефект на некои болести, како последица на земање одредени лекови, или како резултат на прекумерна телесна тежина и обезност.
КОИ СЕ НОРМАЛНИ ВРЕДНОСТИ НА ХОЛЕСТЕРОЛОТ?
Препорачани вредности на холестеролот се:
- Вкупен холестерол < 5,0 ммол/л
- ЛДЛ холестерол < 3,0 ммол/л
- ХДЛ холестерол > 1,0 ммол/л за мажи, односно > 1,2 ммол/л за жени
ПРИЧИНИ за зголемени нивоа на холестерол во крвта:
- Семејна склоност
- Неправилна исхрана
- Прекумерна телесна маса и дебелина
7 ЛЕКАРСКИ СОВЕТИ ШТО ТРЕБА ДА СЕ ПРАВИТЕ ПРЕД ОДРЕДУВАЊЕ НА МАСНОТИИ ВО КРВТА
- Две недели пред земање крв, хранете се вообичаено, но но избегнувајте промени во телесната тежина.
- 48 часа пред земање крв, немојте премногу физички да се заморувате и избегнувајте интензивно вежбање, не консумирајте алкохол.
- 24 часа пред вадење крв, внесете ги во вообичаените оброци храна, но нека не бидат премасни.
- Не е дозволено да земате храна, да пиете кафе, чај, сокови или да пушите 12 часа пред да вадите крв. Дозволено е да се пие само обична вода.
- Земете ги вообичаените лекови во пропишаното време, освен ако вашиот лекар не ви каже поинаку.
- Не земајте непрепишани лекови, хербални лекови и суплементи или додатоци во исхраната без претходно да се консултирате со вашиот лекар бидејќи таквите препарати би можеле да влијаат на резултатите од наодите.
- Вадењето крв најдобро е да го направите во утринските часови.
