Порнографија – формирање став за сексот
Честото гледање порнографска содржина, особено во тинејџерскиот период, може во голема мера да ги обликува сексуалните ставови и убедувања. Гледањето експлицитен сексуален материјал може да ги искриви погледите на младите кога се во прашање сексуалните односи, а најчесто стануваат многу слободни кога е во прашање сексот со повеќе партнери, односите „за една вечер“, нереалните сексуални потреби и односи со пријателите. Момчињата и девојчињата дури почнуваат и да усвојуваат движења и однесувања кои се гледаат во еротските филмови.
Статистички податоци:
- Едно од 8 пребарувања е со еротска содржина;
- 79 отсто од младите непримерени еротски содржини гледаат дома;
- Групен секс на интернет, пред 18-та година гледале 83 % момчиња и 57 % девојчиња.
Секстинг – вовед во небезбеден секс
Секстинг е испраќање или примање пораки, фотографии или видеоснимки со сексуална содржина на кои актерите се голи или полуголи. Ваквиот вид комуникација за тинејџерите претставува предизвик, но може да појде наопаку. Ваквите содржини лесно доаѓаат до рацете на оние на кои не им се наменети и брзо се шират. Доколку се најдат „слободно“ на интернет, се карактеризираат како детска порнографија.
Статистички податоци:
- Еден од 5 тинејџери кој примил порака со експлицитна содржина, истата веднаш ја поделил со најмалку една личност;
- 20 % од личностите на тинејџерска возраст и испратиле разголена фотографија на друга личност;
- 76 % од девојчињата и 57 % од момчињата испраќале сексуални пораки само за да се допаднат некому.
Интернет насилство – лоша комуникација меѓу децата
Насилството го има и во реалниот и во дигиталниот свет. Се разменуваат навреди, а трачевите се шират со брзина на светлината. Се влегува во туѓи профили по социјалните мрежи, електронски пошти…
Статистички податоци:
- 20 % од тинејџерите велат дека нивните врсници главно се непријатни едни кон други;
- 24 % од тинејџерите признале дека за нив била објавена некаква информација која не е вистинита;
- 9 % од нив биле уценувани од страна на пријатели, врз основа на она што го пишувале во приватен разговор.
Интернет предатори – луѓе кои се обидуваат да ги повредат нашите деца
Интернетот е совршено место за нови, убави познанства, но и за остварување контакти со многу малициозни луѓе кои имаат лоши намери. Интернет злоставувачите се експерти кога станува збор за манипулацијата. Способни се да развијат приказна во која децата ќе поверуваат. Тинејџерите сакаат да им се допаднат на другите, да бидат сакани и својата самодоверба да ја хранат со романси кои се одвиваат на интернет. Љубопитни се кога се во прашање сексуалните теми и сакаат да истражуваат. Сето тоа е идеално за злоставувачите кои се трпеливи и упорни и и посветуваат време на својата „врска“. Во екстремни случаи тие луѓе може да се и киднапери.
Статистички податоци:
- 76 % од злоставувачите се постари од 26 години;
- 47 % од злоставувачите се постари 20 години од своите жртви;
- 83 % од жртвите доброволно се нашле лице в лице со своите злоставувачи.
Игрички – поголема изложеност на сексуално и физичко насилство
Иако онлајн игрите може да се многу едукативни и забавни, зад нив се кријат многу опасности. Во повеќето случаи имаат насилна содржина, сексуална конотација или во нив се користи вулгарен речник. Освен тоа игрите подразбираат и комуникација со странци, кои не секогаш се добронамерни.
Статистички податоци:
- 82 % од децата играат игри повремено.
- Еден од тројца тинејџери (15 до 17 години) вели дека игра игри со луѓе кои во тој момент ќе ги запознае онлајн.
- Меѓу ноември 2010 и јануари 2011 на малолетните им било овозможено да купуваат игри за возрасни.
Друштвените мрежи – нов поим за приватност
Друштвените мрежи како Фејсбук и Инстаграм се мошне популарни меѓу тинејџерите. Она на што родителите треба да обратат внимание се примерите и профилите кои нивните деца ги следат.
Статистички податоци:
- И покрај тоа што за активирање Фејсбук-профил е потребно личноста да има минимум 13 години, повеќе од половина родители на деца помлади од 13, рекле дека нивните деца имаат профили, а три четвртини дури и им помогнале да ги отворат истите.
- 40 % од тинејџерите на друштвените мрежи виделе фотографии на кои нивните врсници се пијани, онесвестени или под дејство на дрога. Повеќето тоа го виделе на возраст под 13 години.
- Повеќе од 11 % тинејџери се „хипер активни“ на социјалните мрежи, односно поминуваат време во просек повеќе од 3 часа дневно.
Јутјуб – место каде може да се види сè
Јутјуб е најголемата ризница на материјали. Кој било во секој момент може да постави што сака, па често видеата може да се со непримерена, мошне насилна и експлицитна содржина.
Статистички податоци:
- Во секоја минута на Јутјуб се поставуваат 48 часа видеоматеријали;
- Преку 3 билиони видеоклипови секојдневно се прегледуваат на Јутјуб;
- Корисниците закачуваат 249 000 долгометражни филмови секоја недела.
