Доколку носите контактни леќи, лекарите предупредуваат добро да водите сметка за хигиената за да не се заразите со ретката инфекција од која може дури и да се загуби видот, односно која може да доведе до слепило.
Станува збор за Acanthamoeba keratitis, која доведува до воспаление на корнеата, односно предниот дел од окото. Оние кои носат леќи се склони на оваа инфекција.
Стручњаците предупредуваат дека лошите хигиенски навики за време на ракувањето со контактните леќи може да го зголемат ризикот од контаминација на окото. Фактор на ризик е и туширањето со леќи и пливањето. Најтешко погодените пациенти остануваат со помалку од 25 проценти од видот или ослепуваат откако ќе се заразат.
Една болница во Лондон забележала пораст на инфицираните од 2011 година. Меѓу 2000 и 2003 година во истата болница биле забележани осум до десет случаи на заразени со оваа инфекција, но во периодот од 2011 до 2016 година бројот на инфицираните е зголемен од 35 на 36 годишно.
„Ова зголемување на бројот на инфицирани значи дека оние кои носат леќи мораат да бидат запознаени со ризикот“, рекол професорот Џон Дарт од УЦЛ Институтот.
Превенција
Пред контакт со леќите рацете секогаш треба да бидат чисти и суви, всушност водата не би требало да дојде во контакт со нив. Користете стерилни и проверени производи за одржување на леќите. Не ги ставајте во уста. Не ги менувајте со друго лице. Употребувајте ги истите леќи онолку долго колку што ви препорачал вашиот лекар. Не спијте со нив и никогаш не пливајте со нив…
