Лицата кои ќе искусат пет или повеќе симптоми на коронавирусот во текот на првата недела од болеста, би можело да имаат “долг ковид“, односно кај овие пациенти може да се развијат долготрајни здравствени проблеми. Ако лицето има симптоми на КОВИД-19 кои траат подолго од четири недели од почетната дијагноза, се смета дека тоа е долг КОВИД-19.
Студијата е објавена во списанието Nature Medicine, а опфатени биле 4.182 пациенти кои преку апликација сами ги пријавувале симптомите на инфекцијата со коронавирус.
Околу 13% од испитаниците пријавиле симптоми на коронавирусот кои траеле 28 дена или подолго, а кај 4,5% од испитаниците симптомите траеле осум недели или подолго. Притоа, 2,3% од испитаниците пријавиле дека нивните симптоми траеле најмалку 12 недели.
Симптомите што ги пријавувале испитаниците најмногу вклучувале замор, главоболка, отежнато дишење и губење на вкус или мирис. Постари лица, жени и лица со поголем индекс на телесна маса почесто пријавувале симптоми кои траеле подолго.
Врз основа на овие резултати, истражувачите создадоа предвидлив модел за да направат разлика помеѓу краток и долг КОВИД-19 во рок од една недела на болеста. Истражувачите наведуваат дека долг КОВИД-19 најверојатно ќе се развие кај лица кои во првата недела имаат пет или повеќе симптоми на болеста.
Истражувачите велат дека наодите од студијата можат да помогнат во идентификување на лицата со ризик за долг КОВИД и да помогнат во спречување, лекување и рехабилитација.
