Доколку сте под стрес и навечер имате проблем да заспиете, мирисот на лаванда би можел да ви помогне да се опуштите. Лавандата е позната по смирувачките својства – нејзиниот мирис ни помага да се опуштиме и делува анксиолитично. Маслото од лаванда содржи линалол и линалил-ацетат кои директно делуваат на централниот нервен систем и смируваат. Заради ова вдишувањето на мирис од лаванда би помогнало во опуштањето на мускулите и нервите и на крајот би помогнало побрзо да заспиете.
Како е најдобро да се користи лавандата доколку сакате да се релаксирате и побрзо да заспиете?
Доколку имате длабока када, тогаш овозможете си топла купка во која сте додале капки етерично масло од лаванда. Друга опција е отприлика половина час пред спиење во чинија да ставите врела вода (околу 500 мл) и во неа да додадете 2 до 3 капки етерично масло од лаванда. На овој начин ќе го освежите воздухот во просторијата, а мирисните испарувања ќе ви помогнат да се опуштите. И на крајот, можете две-три капки масло од лаванда да нанесете на долната страна од перницата, односно на навлаката.
Уште една добра вест е тоа дека мирисот на лаванда ги брка комарците, па така мирно ќе спиете.
