Како нормална телесна температура за здрав човек измерена на кожата се зема вредноста од 36 до 37 степени. Природно е утринската телесна температура да е пониска за околу 0,3 степени од онаа вечерната. Обично е нешто повисока кај малите деца. Температурата на слузницата може да изнесува и до еден степен повеќе од онаа на површината на кожата.
Стручњаците објаснуваат дека отстапувањата од нормалната температура може да бидат и здравствени индикатори, а спротивно на прифатеното мислење – намалената температура може да биде еднакво опасна, па дури и поопасна од онаа зголемената, од која сите се плашиме.
Постојаната температура која изнесува под 36,5 степени во текот на денот е најчест показател за забавен метаболизам. Ако е придружена со симптоми како недостаток на енергија, поспаност, побавно варење, дебелеење, испукани нокти и опаѓање на косата – таа може да укажува на забавена работа на штитната жлезда, односно хипотиреоза. Оваа хормонална болест е се почеста меѓу женската популација, а лесно се дијагностицира со анализа со хормонот на штитната жлезда и антителата во крвта.
Но, температурата на телото може да падне и од други причини, како што е изложеноста на ладно време или заради долготрајно носење на мокри алишта. Сепак, ако температурата пониска од 36 степени трае, може да е симптом за: инфекции, пореметување на работата на бубрезите и нивно оштетување, намалена функција на црниот дроб, шок, стрес, несоница, дијабетес, злоупотреба на алкохол и дрога, Адисонова болест…
Студиите покажуваат дека после 60-та година од животот телесната температура се намалува за околу 0,3 степени. Тоа е резултат на забавување на метаболизмот, а пониската температура најчесто ја следат послаба циркулација и ладни екстремитети.
Кај изложување на студ, телото почнува да ја чува топлината за да ги заштити виталните органи како срцето, белите дробови и мозокот. Заради тоа помалку крв доаѓа до подрачјата како што се дланките и стапалата, а тоа значително побрзо се случува кај жените.
