Една неодамнешна канадска студија покажала дека трчањето може да им помогне на личностите кои сакаат да ги остават цигарите. Канадските научници во текот на 10 недели следеле 168 учесници во програмата Run to quit, чија цел било токму тоа – да им се помогне на пушачите да се отарасат од оваа штетна навика.
Оваа програма подразбирала трчање во група со придружба на тренер и терапевт специјализиран за процесот на оставање на цигарите. Седумдесет и двајца учесници ја завршиле програмата до крај, а триесет и седум од нив успешно ги оставиле цигарите. Востановено е дека и 90 проценти од учесниците кои истрајале до крај севкупно го намалиле пушењето.
Самото истражување позитивно влијаело на здравјето на испитаниците – нивното ментално здравје се подобрило, додека количеството на јаглен моноксид во издишаниот воздух кај личностите кои трчале се намалило за третина.
