Гинеколошкиот преглед се разликува во зависност од годините, па така постојат разлики во прегледот на жените кои не се сексуално активни, оние кои се во репродуктивна возраст, бремените жени, повозрасните и оперираните жени. Жените на кои хируршки им се отстранети матката и јајниците, исто така, треба редовно да вршат гинеколошки прегледи.
Првата посета на гинеколог не мора нужно да заврши со преглед, што е особено битно за младите девојки, кои ќе се чувствуваат многу попријатно доколку прво го запознаат својот гинеколог и ќе поразговараат, а на тој начин ќе добијат и одговори на повеќе важни прашања врзани со репродуктивното здравје и важноста на редовните гинеколошки прегледи.
Според анамнезата, односно причината за посета на гинеколог, докторот ќе одлучи дали кај жените кои немале сексуални односи, е потребен или не е потребен гинеколошки преглед. Во принцип, жените кои немале сексуални односи не може да се прегледаат преку вагината, па затоа се прегледува само надворешниот дел од гениталиите (визуелно) и хименалниот отвор. Ако е природно, спонтано проширен или пукнал на некој друг начин, прегледот може да се изврши со мал, за таа намена предвиден инструмент. Доколку е недопрен, а постои потреба, се прави ректален преглед.
Првата посета на гинеколог не мора да заврши со преглед, девојките ќе се чувствуваат многу попријатно доколку прво го запознаат и поразговараат со својот гинеколог
Ултразвучниот преглед, исто така, не може да се изврши преку вагината, па се прави преку стомакот или ректално. Ако ултразвукот се прави преку стомакот, девојките мора да дојдат подготвени, бидејќи прегледот се прави со полн мочен меур, што значи дека најмалку половина час пред испитувањето треба да испијат што повеќе течности. За жал, ваквиот преглед не е секогаш успешен, особено кај жени со дебел абдоминален ѕид. Затоа е идеално да се направи ректален преглед, бидејќи на тој начин матката и јајниците може да се видат исто како и кај вагинален преглед. Денешните сонди се тенки и лесно можат да се воведат во дебелото црево.
