Подуеноста често е резултат на погрешен избор на храна или лошо избрано време за консумирање на одредени намирници. Во продолжение ви откриваме кои видови на храна може да го предизвикаат ова непријатно чувство во стомакот.
Кељ, зелка, брокула
Содржат шеќер (рафиноза), кој тешко се вари, па во текот на ферментацијата се појавуваат гасови кои предизвикуваат подуеност. Сепак, тоа не значи дека треба целосно да ги исфрлите од вашата исхрана. Доколку редовно јадете храна богата со растителни влакна, ќе го зајакнете системот за варење и полесно ќе се борите против подуеноста. Затоа слободно продолжете со консумирање на кељ, зелка и брокули. Освен тоа, најдобро е овој зеленчук да го консумирате обарен или варен, зашто на тој начин станува полесен за варење.
Јаболка
Јаболката се богати со влакна, но, од друга страна, содржат многу шеќер (фруктоза и сорбитол), кој за многу луѓе е тежок за варење. Природната последица на тоа е појава на гасови и надуеност. Но ни од јаболката не мора веднаш да се откажете – едно јаболко содржи дури 4,5 грама протеини и 10 % од дневно препорачаните дози на витамин Ц. Слободно продолжете да ги консумирате, но внимавајте да ги јадете сами, односно на празен желудник или помеѓу оброците. Во комбинација со друга храна или, на пример, после ручек, јаболкото ќе предизвика гасови и надуеност.
Млеко и млечни производи
Ако се чувствувате подуено откако ќе изедете овесна каша со млеко или парче сирење, можно е да ве мачи интолеранција на лактоза. Тоа значи дека во вашиот организам недостасува ензим кој ја разградува лактозата (шеќерот кој се наоѓа во млечните производи) што предизвикува гастроинтестинални гасови кои доведуваат до подуеност. За да проверите дали лактозата и млечните производи ви пречат, следниот пат кога ќе пазарите во продавница побарајте млеко без лактоза и проверете како ќе реагира вашиот организам.
Мешунки
Ова не е никаква новост и, веројатно, веќе знаете дека мешунките, како што се гравот, грашокот и леќата се вистинска ноќна мора за сите оние кои имаат послаб систем за варење. Мешунките се богати со белковини, но истовремено содржат и влакна и шеќери кои потешко се апсорбираат. За да го избегнете чувството на подуеност, комбинирајте ги мешунките со житарки, како што се киноа, овес или интегрален ориз.
