Комарците се неизбежни инсекти, но и нивниот убод најчесто најлесно поминува и е безопасен за повеќето од луѓето. Возрасните најчесто имаат црвенило и мал оток околу убодот, но децата можат да покажат и алергиска реакција, па да им треба и лекарска помош. Во вообичаени ситуации е доволно да се стави ладна облога на местото на убодот или да се намачка со смирувачки гел или балзам. Треба да се избегнува чешањето.
Каснувањето од пчела, оса или стршлен, пак може да биде многу посериозно. На местото на убодот треба да се стави ладна облога или лед, а ако убодот е од пчела треба да се извади и трнот. Осите и стршлените не оставаат трн, но нивниот отров е многу посилен. Може да предизвикаат алергична реакција и анафилактички шок, опасен по живот.
Ако болката, црвенилото и жарењето се шират, а с епојават и мачнина, отоци и отежнато дишење веднаш треба да се оди на лекар.
Превентивно, во аптеките има спрејови за заштита од убоди, кои се прскаат врз кожата.
Крлежите демнат од високите треви а се опасни бидејќи пренесуваат заразни болести како менингоенцефалитис и борелиоза. Затоа, ако планирате прошетка во природа одберете облека со долги ракави ногавици и високи чорапи. Дома задолжително истуширајте се пред да си легнете и прегледајте го целото тело. Ако забележите ситна црна точка под кожата, веројатно се работи за крлеж. Доколку сметате дека сте спретни извадете го сами со пинцета, но подобро е да побарате лекарска помош.
Најголемиот број од пајаците од нашето поднебје се безопасни, а убод од пајак најчесто предизвикува црвенило и мал оток. На местото е доволно да се стави ладна облога или мраз и да не се чеша.
