Покрај зголемена температура, сува кашлица и отежнато дишење, КОВИД-19 се поврзува и со низа други симптоми, и постојано се дознава за некој нов за кој до вчера не се зборувало. Сега се повеќе почнува да се зборува за кожни манифестации на оваа болест, а првите извештаи од Италија и од Тајланд укажуваат на дека кожниот осип може да биде уште еден прилично редовен симптом на КОВИД-19.
“Не сум сигурна дека за тоа многу се знае меѓу широката популација, односно надвор од стручните дерматолошки кругови, а ние штотуку почнуваме да добиваме орви извештаи за тоа во дерматолошката литература“, вели д-р Сара Јанг, дерматолог на клиниката Кливленд, додавајќи дека се покажало дека некои пациенти навистина имале кожни симптоми, иако кожниот осип се уште никаде не е специфично поврзан со КОВИД-19 или со потешка форма на болеста.
Една од првите студии е онаа на дерматолози кои во Италија работата со заболени од КОВИД-19, а која покажала дека во група од 88 пациенти со потврдена дијагноза на новиот коронавирус, 20% од нив развиле кожни симптоми, со тоа што нешто помалку од половината пациенти развиле осип на самиот почеток на болеста, додека поголемата половина осип добиле по хоспитализацијата.
Меѓу пациентите кај кои се јавиле кожни симптоми, најчест бил еритематозниот осип или осип во форма на црвени дамки. Неколкумина развиле уртикарија или осип во форма на ситни мозолчиња, а еден пациент имал меури слични на оние кај сипаница. Најчесто осипот се јавувал во подрачјето на трупот.
Во извештајот од Тајланд, лекарите опишале пациент заболен од КОВИД-19 кај кој на почетокот била погрешно дијагностицирана денга треска, бидејќи во болница се јавил со осип карактеристичен за таа болест.
Д-р Јанг додава дека неодамна примиле извештај од дерматолог за пациенти со коронавирус, кај кои се развил livedo reticularis или виолетов мрежаст осип, кој укажува на запушување на малите крвни садови близу површината на кожата.
“Пријавените кожни симптоми и осипи се толку различни и може да се препишат на низа други болести, така што по самиот вид на осипот не може да се препознае дали пациентот има КОВИД-19. Прашањето кое сега ги интересира дерматолозите, а и останатите лекари, е дали може присуството на осип или одреден тип на осип да укажува на одреден тек на болеста или на тежината на болеста. Со други зборови, се поставува прашањето, може ли појавата на осип на било кој начин да влијае на прогнозата на исходот на болеста кај пациентите. Но, одговор на тоа прашање засега немаме“, вели д-р Јанг.
Минатата недела и француските дерматолози пишуваа за овој симптом кај КОВИД-19 во извештајот кој е објавен во дневниот весник Le Figaro. Тие осипот на кој наишле кај заразените со новиот коронавирус, го опишале како налик на ситни убоди од комарци.
Француското национално здружение на дерматовенеролози нотира дека изненадна појава на болно црвенило, црвенило кое наликува на смрзнатини по рацете или уртикарија треба веднаш да им биде знак на луѓето да се обратат кај лекар.
“Анализата на многу случаи кои се пријавени во здружението, покажува дека може да се работи за поврзаност на кожниот осип и КОВИД-19, и затоа ја предупредуваме јавноста и медицинските стручњаци за оваа појава, за да што порано препознаат потенцијално заразно лице, дури и ако можеби немаат респираторни симптоми“, стои во извештајот на Француското национално здружение на дерматовенеролози.
