Губењето на чувството за мирис беше знак за зараза со коронавирусот од почетокот на пандемијата, но не се знаеше колку често се појавуваат симптомите како овие, ниту колку долго може да траат.
Настојувајќи тоа да го откријат, истражувачите анализирале 18 претходни студии кои опфатиле 3.700 пациенти.
Во најновата студија, што ја објави ВМЈ, било утврдено дека шест месеци по заразата со коронавиус, сетилото за мирис не било опоравено кај четири проценти од пациентите. Во меѓувреме, кај два проценти од пациентите не се опоравило ниту сетилото за вкус.
Не се знаело дали станува збор за целосно или парцијално опоравување.
Истражувачите проценуваат дека губењето на осетот за мирис може да трае кај 5,6 проценти од пациентите, а сетилото за вкус може да не се опорави во целост кај 4,4, проценти од пациентите.
Кај една жена, наведуваат истражувачите, сетилото за мирис не се опоравило повеќе од две години по инфекцијата со коронавирус.
Истражувачите велат дека, иако кај повеќето пациенти сетилото за мирис и вкусот требало да се опорави во период од три месеци од заразата со ковид, “голема група на пациенти би можела да развие и долготрајна дисфункција“.
“Тоа (можеби бара) навремена идентификација, персонализиран третман и долготрајно следење“, се истакнува во студијата.
Д-р Дени Алтман, имунолог од Кралскиот колеџ во Лондон, кој не бил вклучен во истражувањето, вели дека тоа е “моќна и важна студија“.
“Студиите како ова нè предупредуваат за скриениот товар на луѓето кои трпат трајни симптоми, но можеби не мислеле дека треба да контактираат лекар од општа пракса, претпоставувајќи дека не може многу да се направи“, вели тој.
Истражувањето исто така покажало дека жените имаат помала веројатност за опоравување на овие сетила отколку мажите.
Причината за нееднаквоста е непозната, но истражувачите сугерираат дека жените главно имаат подобри сетила за мирис и вкус, што значи дека нивната потенцијална загуба е поголема.
Податоците не го вклучуваат оној за тоа од кои варијанти на КОВИД биле болни пациентите. Претходни истражувања покажаа дека поновите варијанти на омикрон имаат помала веројатност да предизвикаат губење на мирисот.
