Пластичниот материјал натопен во вода е одлична основа за развој на бактерии и габи, предупредуваат научниците од „Swiss Federal Institute of Aquatic Science and Technology“ во Цирих и од американскиот Универзитет во Илиноис.
„Внатрешните делови на пластичните играчки се преполни со бактерии и габи, кои може да се видат и со голо око, но кога детето при играње ќе ги притисне, од нив излегува густа темна течност“, се вели во нивното соопштение.
Многу родители сметаат дека патките и други детски играчки од бањата се чисти само затоа што се натопени во вода и немаат потреба од дополнително чистење. Кога станува збор за гумени играчки, кои свират и исфрлаат вода, прскаат при стискањето, токму оваа вода што не се испразнува од нив, се претвора во легло на бактерии.
Американските и швајцарските научници спровеле експеримент со играчки за бањање и вода кој траел 11 недели. Некои од играчките биле изложени на чиста, а некои на нечиста вода, која содржела остатоци од сапун и нечиста вода после капење. Во внатрешноста на гумените играчки, кои по завршувањето на експериментот, биле пресечени на половина, биле откриени помеѓу 5 и 75 милиони клетки на квадратен сантиметар. Било напоменато дека е забележана разлика во количината на „нечистотија“, во зависност од видот на водата во која се наоѓале играчките.
Внатрешните делови на пластичните играчки се преполни со бактерии и габи, кои може да се видат и со голо око
Во речиси 60 отсто од играчките се пронајдени габи, а потенцијално и патогени бактерии, како што се Legionella и Pseudomonas aeruginosa, и тоа во 80 отсто од анализираните играчки. Pseudomonas aeruginosa генерално не предизвикува инфекција кај здравите луѓе, а ако се појави, воглавно, е блага. Многу потешки облици на инфекција се јавуваат кај хоспитализирани лица со некои други болести или состојби.
Патогенот е микроорганизам кој предизвикува болест. Научниците истакнале дека наведените бактерии и габи обично не го загрозуваат здравјето на децата, бидејќи нивниот имунитет успева да се одбрани, но до потенцијални проблеми може да дојде ако постојат отворени рани, како и кај деца со егзема.
Микробиологот Фредерик Хамс, еден од членовите на тимот, изјавил дека бактериите од пластичните играчки кај некои деца и го зајакнуваат имунитетот, што е позитивно, но во некои случаи може да резултираат со стомачно-цревни инфекции, инфекции на око или уво.
Дали на децата треба да им се одземат пластичните патки и други играчки во кадата? Хамс е против ова радикално решение и советува построги правила кога станува збор за полимерни материјали, од кои се произведуваат играчките за бањање. А додека сите чекаме нова генерација пластични патки, би требало еднаш неделно добро да ги миеме и дезинфицираме играчките.
Се препорачува добро да се измијат со антибактериски сапун, а одвнатре со мешавина на оцет и сода бикарбона. Потоа треба да се исцедат и да се остават да се исушат до наредното бањање.
