Популарната вештачка црвена боја за храна, која се наоѓа во многу најпродавани прехранбени производи, може да го зголеми ризикот од Кронова болест и улцеративен колитис, сугерира нова (мала) студија. Како што е објавено во Nature Communications, адитивот или синтетичката боја наречена Allura Red AC, FD&C Red 40 и Food Red 17 му штети на здравјето на цревата и поттикнува воспаление доколку се консумира често и долгорочно. Истражувањето покажало дека овој адитив директно ја попречува цревната бариера и го зголемува производството на серотонин и хормони кои се наоѓаат во цревата. Оваа реакција го менува микробиомот, што доведува до зголемена чувствителност на воспалителни состојби на цревата.
Нарушување на вниманието
“Она што го откривме е алармантно затоа што оваа вообичаена синтетичка боја за храна е можен прехранбен тригер за воспалителна болест на цревата“, вели еден од авторите на студијата д-р Валиул Кан од Универзитетот МекМастер во Хамилтон, Онтарио.
Повременото консумирање на бојата не поттикнало воспаление, но д-р Кан предупредува дека врската помеѓу најчесто користените прехранбени бои и воспалителните болести на цревата секако бара дополнителни истражувања. Долго постоел сомнеж дека Allura Red AC му штети на здравјето. Голема загриженост постои околу влијанието на вештачките бои за храна врз однесувањето на децата.
Според Американската академија за педијатрија, вештачките бои ги засилуваат симптомите на нарушување на вниманието и хиперактивноста, но регулаторните тела велат дека количината на хемиската боја во просечната исхрана е премногу мала за да претставува закана по здравјето. Препорачаниот дневен внес не смее да надминува 3,2 милиграми по килограм телесна тежина на една личност.
Црвената боја е сеприсутна во преработената храна, бонбоните, грицките, безалкохолните пијалаци и житариците, зачините, сладоледите, пекарските производи, овошните сокови и козметиката.
