Улогата на дезодорансот е сузбивање на непријатниот мирис и намалување на лачењето на пот што е нормална физиолошка појава. Потта во контакт со бактериите и со воздухот поттикнува појава на непријатен мирис кој е поинтензивен кај лицата кои повеќе се потат, во текот на летото и при носење синтетичка облека. Денес на пазарот се присутни многубројни дезодоранси кои се во облик на спреј, рол-он, стик, крема, па секој може да одбере што му одговара. Примената им е различна, а најчесто се нанесуваат секојдневно по туширање. Некои производители препорачуваат примена на дезодорансот навечер по туширањето, а некои само два пати неделно.
Како и секој друг козметички производ кој се нанесува на кожа, така и дезодорансите може да предизвикаат алергиска реакција. Тие имаат различен хемиски состав, но најчесто содржат мирис, соли на алуминум, конзерванси, алкохол…
Алергијата може да се појави веднаш по ставањето во форма на пецкање, чешање и црвенило. Воспалението може да биде поттикнато и од претходна депилација на пазувите, па затоа препораката е да не се става дезодоранс веднаш по вадење на влакненцата под пазувите. Но, ако чувството на нелагодност продолжува и по понатамошно користење на дезодоранс, независно од депилацијата, тогаш тој е причина за појава на алергиска реакција. Одредени дезодоранси интензивно ја менуваат Ph на кожата па може тоа да е причина за појава на црвенило и на иритација на кожата. Затоа е важно да користите дезодоранс или рол-он кој не ја нарушува Ph и нема агресивни мирис и алкохол. Во случај веднаш по ставањето дезодоранс да почувствувате пецкање или нелагодност на кожата, се препорачува кожата веднаш да се измие, за да се прекине дејството. Алергиите на дезодоранс не мора да бидат видливи и да се појават веднаш, понекогаш црвенилото може да се појави неколку дена по примената на дезодорансот, што делува збунувачки, бидејќи лицето постојано, секојдневно става дезодоранс без да се сомнева дека тој е причина за алергија.
Можете да се обидете појавеното црвенило да го смирите со неутрални креми, но ако воспалението не поминува побарајте совет од дерматолог. Секако, во никаков случај не продолжувајте со користење дезодоранс.
