Децата со аутизам во однос на здравите деца се поподложни на развој на респираторни алергии и алергиски реакции на кожата, како и алергии на храна, покажала американската студија, во која учествувале речиси 200 000 деца на возраст од 3 до 17 години.
Децата со аутизам имаат два пати поголем ризик од алергија на храна, 50 проценти поголем ризик од алергиски реакции на кожата и 28 проценти поголем ризик од респираторни алергии.
Во моментов не е јасно дали постои заедничка причина за овие состојби. Се смета дека дополнителните истражувања би требало да утврдат дали постои каузален однос помеѓу аутизмот и алергијата
Исто така, експертите потенцираат дека родителите и лекарите би требало да бидат свесни за зголемената преваленција на алергии кај деца со аутистичен спектар на нарушувања, особено кај мали деца кои можеби не можат добро да ги опишат своите здравствени проблеми.
Пореметувањата од аутистичен спектар (ASDs) се невроразвојни пореметувања, кои во изминатите неколку децении постојано се зголемуваат. Во САД 1 од 59 деца го има споменатото нарушување. Заболените од аутистичен спектар на нарушувања обично имаат проблеми со социјалните интеракции, јазикот и комуникацијата, а исто така се склони и кон повторувачко однесување, наведува „JAMA Network Open“.
