Постојат голем број на луѓе кои имаат алергија на некој тип на храна, но многу повеќе луѓе всушност имаат интолеранција на одредена храна.
Како да ги разликувате
Карактеристики на алергија на храна се:
- Предизвикува остри карактеристични симптоми, обично во рок од неколку минути или секунди;
- Во екстремни случаи може да биде опасна по животот;
- Не е условена со количината на храна што ќе се изеде. И најмала количина може да предизвика реакција;
- Лекар може да открие на која храна сте алергични со неколку тестови.
Карактеристики за интолерација на храна се:
- Предизвикува одложени, долготрајни симптоми кои најчесто го вклучуваат системот за варење;
- Никогаш не е опасна по животот;
- Најчесто зависи од изедената количина храна. Потребна е поголема количина на храна за да се предизвика реакција, иако постојат лица кои ќе почувствуваат реакција и од мали количини;
- Тешко се дијагностицира. Постојат само неколку сигурни тестови.
Вистинска алергија на храна е ретка, додека интолеранцијата е многу распространета. Интолеранцијата вклучува симптоми како што се мигрена, осипи и проблеми со стомакот.
Што е алергија на храна
Алергија на храна е брз и потенцијално сериозен одговор на имуниот систем на одредени типови на храна. Доколку имате алергија, антителата на имуниот систем (IgE тела) ја напаѓаат храната мислејќи дека се работи за некој напаѓач кој може да му наштети на организмот. Испуштањето на инфламаторни сусптанци, предизвикува остри и непријатни последици, кои претставуваат класични алергиски симптоми како осип, тешко дишење и чешање. Најчести алергии се на кикирики, јаткасти плодови, риба и школки.
Што е интолеранција на храна
Интолеранција на храна е пораспространета отколку алергијата на храна. Симптомите се појавуваат поспоро, понекогаш и со часови по консумирање на проблематичната храна. Можно е да имате интолеранција и на неколку видови на храна. Интолеранција на лактоза и целијакија се најчести облици на интолеранција на храна.
