Аналниот рак е еден од најагресивните видови на карцином, особено ако не се открие во рана фаза. Неговата неповолна положба и непријатност што на почетокот ја предизвикува со своите симптоми, за повеќето луѓе е тема за која не сакаат да зборуваат, а ретко ќе побараат и стручна помош. Сето ова се причини зошто овој рак често се превидува и не се лекува навреме.
Што е рак на анусот
Ракот на анусот е карцином кој настанува во аналниот канал, завршниот дел на дигестивната цевка, долга 4 сантиметри или околу самиот анус, завршниот отвор на дигестивната цевка, низ која телото се ослободува од столицата. Жените чинат две третини од заболените.
За жал, овој вид на рак е во пораст последните неколку години, иако оваа болест е се уште поретка од ракот на дебелото црево. Важно е да се нагласи дека ракот на анусот и ракот на дебелото црево се два различни видови на рак. Ракот на дебелото црево влијае на дебелото црево и целиот ректум, додека аналниот рак влијае само на отворот, односно ректумот или анусот.
Ова се симптоми кои не смеете да ги занемарите:
- Чешање во анусот
- Болка во анусот
- Необични столици
- Анално крварење
- Крв во столицата
- Необичен исцедок од анусот
- Тврди подрачја или јазол во близина на анусот
Кои се точно причините за рак на анусот се уште не е познато. Сепак, некои ризик фактори кои со сигурност допринесуваат се ослабен имун систем, пушење, недоволно движење и изостанок на физичка активност, како и зачестена иритација на анусот.
Стручњаците напоменуваат дека наведените симптоми може да бидат предизвикани и од бенигни појави како што се хемороиди, анални пукнатини или анални брадавици. Но, и тие треба да се лекуваат навреме.
Новите истражувања покажуваат дека и овој, како и ракот на грлото на матката и тумор на пенисот, најчесто се појавуваат како последица на инфекција со ХПВ (хуман папилома вирус), познат по тоа што предизвикува кондиломи, од кои страдаат се поголем број млади лица. Поради тоа, лекарите, ја истакнуваат важноста за заштита при полов однос.
ШТО СЕ КОНДИЛОМИ
Кондиломите или гениталните брадавици се распространети и многу заразни, а се наоѓаат на површинскиот слој на кожата на гениталното подрачје. Станува збор за сексуално пренослива болест, која може да го зафати целокупниот долен дел од гениталното подрачје, но и усната шуплина и грлото.
Аналниот рак се развива на самиот влез во анусот, а кога мутираните клетки ќе почнат ненормално да се размоножуваат, ракот се шири понатаму во ректумот и во дебелото црево. Поради големиот број лимфни јазли во близина, ракот се заканува да се прошири со метастази по целото тело.
Статистиките покажуваат дека се уште најчесто ги погодува возрасните лица, над 60 години. Но, сепак бројките полека се менуваат, а возрасната граница се спушта. Затоа, раното откривање е од витална важност за успешно лекување.
