Вечен проблем е што која ставка значи кога ќе ги добиете резултатите од анализа на урината. Некогаш за некоја референтна вредност не знаеме дали е нормална и што точно значи. Ова се основни толкувања на анализа на урината.
ИЗГЛЕД: Бистар
- Ако изгледот е заматен, тоа укажува на зголемен број на леукоцити, габи, бактерии, слуз и друго и можно е да постои некој воспалителен процес.
БОЈА: Жолта
- Црвената боја укажува на присуство на хемоглобин, најчесто причина е оштетување на бубрезите (најчесто станува збот за камен или песок во бубрегот), но причина може да биде и воспалителен процес на мочните канали и мочниот меур.
- Темнокафената боја укажува на зголемен билирубин, и е најчест знак на оштетување на црниот дроб и појава на жолтица. Доколку веќе имате зголемен билирубин, овој наод на урината е нормален.
РЕАКЦИЈА: Кисела
- Алкалната реакција обично укажува на бактериска инфекција.
РЕЛАТИВНА ГУСТИНА: Референтна вредност за возрасни 1,012-1,025
- Зголемена густина може да биде знак за хормонално пореметување, пореметување на функцијата на надбубрежната жлезда, дијабетес, хипертензија, проблеми со бубрезите. Исто така се појавува и како последица на дехидратација, дијареа, повраќање и висока температура.
- Намалената густина е знак за зголемено лачење на урина.
ГЛУКОЗА: Негативна
- Појавата на глукоза во урината најчесто се јавува кај дијабетичарите и е поврзана со појавата на зголемена глукоза во крвта (над 10 mmol/l).
ПРОТЕИНИ: Негативно
- Позитивните протеини може да се јават во бременоста или по зголемена физичка активност. Во овие случаи тоа не е знак за патолошки промени, а ако не станува збор за овие две состојби, обично е знак на воспалителен процес во организмот.
БИЛИРУБИН: Негативен и УРОБИЛИРУБИН: Негативен
- Позитивниот може да биде знак на оштетување на црниот дрод и жолчката.
АЦЕТОН: Негативен
- Позитивниот ацетон се јавува кај дијабетичарите.
СЕДИМЕНТ
ЕРИТРОЦИТИ
СВЕЖИ: Негативно
- Позитивни свежи еритроцити чести се знак за присуство на камен или песок во бубрегот или во мочните канали.
БЛЕДИ: Негативно
- Позитивни бледи се знак за неодамна прележана инфекција или хронични болести на бубрезите.
ЛЕУКОЦИТИ: До 5 нормално
- Големиот број на леукоцити укажува на некој воспалителен процес во организмот.
ЕПИТЕЛНИ КЛЕТКИ
ПЛОЧЕСТИ: Малку
- Плочестите клетки го обложуваат уринарниот тракт и нивната појава во било која мера нема големо значење во дијагностиката.
КРУЖНИ: Негативно
- Позитивните кружни клетки укажуваат на оштетување на бубрегот.
БАКТЕРИИ: Негативно
- Позитивниот наод може да биде последица на нехигиена или неправилно земена урина во сад кој не бил стерилен, но првенствено причина е инфекција.
УРАТИ: Негативно
- Појавата на аморфни урати во урината нема дијагностичко значење.
КРИСТАЛИ НА КАЛЦИУМ-ОКСАЛАТ: Малку
- Позитивниот наод може да биде знак за песок во бубрегот, но не мора да укажува на заболување.
КРИСТАЛИ НА МОЧНАТА КИСЕЛИНА: Негативни
- Нивната појава може да биде знак за бактериска инфекција.
СЛУЗ: Негативно или малку
- Појавата на слуз нема дијагностичко значење.
ГАБИ: Негативни
- Појавата на габи може да се јави кај дијабетичарите или е знак за габична инфекција.
ЦИЛИНДРИ: Негативни
- Позитивни цилиндри се знак за хронично бубрежно заболување.
