Анхидроза е неспособност за нормално потење. Иако можеби не звучи како сериозна состојба, анхидрозата може да биде опасна по живот. Кога не се поти, телото не може да се олади, а тоа може да доведе до презагревање, а понекогаш и до топлотен удар.
Оваа болест понекогаш може да биде тешко да се дијагностицира. Благата анхидроза е често незабележлива, како и можните причинители кои ја предизвикуваат оваа состојба, вклучувајќи трауми на кожата, одредени болести и лекови.
Лекувањето вклучува откривање и третман на основниот причинител, доколку може да се најде.
Симптоми
- Малку потење или воопшто непотење;
- Вртоглавица;
- Грчеви во мускулите или слабост;
- Чувство на топлина.
Недостаток на потење може да се појави
- На поголемиот дел од телото;
- На едно подрачје;
- На повеќе подрачја.
Нормалните подрачја може да се обидат да го надоместат производството со повеќе пот, така што е можно обилно да се потите на еден дел од телото и многу малку или воопшто да не се потите на друг дел. Анхидрозата која влијае на поголем дел од телото спречува правилно ладење, така што интензивна физичка активност, тешка физичка работа и топлото време може да предизвикаат грчеви, исцрпеност, па дури и топлотен удар.
Анхидрозата може да се развие самостојно или како еден од неколкуте симптоми на некое друо пореметување, како што е дијабетесот, невропатијата или псоријазата.
До оваа болест доаѓа кога потните жлезди престануваат да работат, а тоа може да се случи поради низа причини.
Оштетување на нервите
Автономниот нревен систем ја регулира дигестијата, работата на срцето, крвниот притисок и телесната температура. Оштетувања на нервите кои го контролираат овој состав може да влијаат на функционирањето на потните жлезди.
Оштетување на кожата
Физичка повреда на кожата, особено од тешки изгореници може трајно да ги оштети потните жлезди.
Одредени лекови
Многу лекови, вклучувајќи ги оние за срце и притисок, за контрола на мочниот меур, мачнини и психијатриски препарати може да го намалат потењето. Потењето обично се враќа во нормала кога ќе престанат да се земаат лековите. Ако се развие анхидроза по земањето на нови лекови, треба за тоа да го информирате својот лекар.
Генетски причини
Некои деца имаат генетски пореметувања кои предизвикуваат потните жлезди да не ја работат својата работа. Може да имаат наследно пореметување – хипохидротична ектодермална дисплазија која предизвикува да телото развие малку или воопшто да нема потни жлезди.
Дехидрација
Се случува телото да нема доволно течности за извршување на своите нормални функции. Во најтешките случаи дехидрацијата може да влијае на способноста за потење. Дехидрацијата е честа кај интензивна дијареа и повраќање и кај висока телесна температура. Може да се појави и кај зачестено мокрење, што често е резултат на недијагностицирана или неконтролирана шеќерна болест.
