Анксиозното пореметување, како и секое друго пореметување на личноста, се лекува во комбинација со медикаментозна терапија и многу поважно – психо терапија. Без оглед на тоа колку долго патите од анксиозност и што е она што ја предизвикува, најдобар начин да се соочите со сите проблеми кои ги имате е комбинацијата од терапија и добра и отворена соработка со психолог или психијатар. Само стручно лице поседува доволно вештини кои може да ги подели со вас и да ви помогне на најдобриот можен начин.
Најважно е да се открие причината за анксиозност
Анксиозното пореметување може да биде предизвикано од бројни фактори – промена на работата, промена на местото на живеење, промена на животните навики, развод, смрт на блиска личност…, затоа најважно од се е да открие причината која ве прави толку психолошки оптоварени. Наталожениот стрес резултат на секојдневното живеење сепак е најчеста причина за ова заболување, а се јавува како резултат на неможноста на луѓето на вистинскиот начин да се соочат со секојдневните конфликтни ситуации.
Препознајте ги симптомите
Може да се манифестира на различни начини – забрзана работа на срцето или тахикардија, слабост во мускулите или напнатост, замор, мачнина, болка во градите, недостаток на воздух, болки во стомакот, главоболка… се само симтоми, но доколку се појават или повторат во краток период се, секако, аларм кој мора да ве одведе на лекар. Не заборавајте, една панична епизода во животот, секако, не значи дека патите од анксиозно пореметување.
