Болеста обично се јавува како последица на нелекувана забна шуплина или пукнатина во забот која им овозможува на бактериите пат во внатрешноста. Апсцесот обично се развива ако забот пропаѓа или изумира. Во комората на срцевината на забот и каналот на коренот се присутни отровни материи кои се создаваат со распаѓање на мртвата срцевина на забот, како и бактерии кои лесно можат да ја инфицираат околната коска. Лекувањето на апсцесот на забот вклучува исушување на чирот и ослободување на подрачјето на инфекцијата. Забот може да биде спасен со лекување на коренските канали, но во некои случаи ќе биде потребно да се извади забот, особено кога воспалението напредувало и постои опасност од ширење на инфекцијата на околното ткиво. Нелекувањето на апсцесот на забот може да доведе до сериозни проблеми, па дури и оние опасни по живот. Апсцесот може да се спречи со правилна грижа за забите, здрава исхрана и обавување редовни стоматолошки прегледи.
Симптоми:
Апсцесот се манифестира како упорна „отчукувачка“ болка, а загризот или џвакањето со заболениот заб обично предизвикува мошне сериозни болки. Ако апсцесот пукне, гној со непријатен вкус се цеди во устата, а болките попуштаат. Може да се појави болка и отекување на жлездите на вратот, како и образот. Често се јавува и треска, па болниот се чувствува исклучително лошо. Ако не го лекувате расипаниот заб, тој ќе изумре, а мртвиот заб во некои ситуации може да предизвика апсцес. Ако не се лекува постои опасност од ширење на инфекцијата низ крвотокот и општо труење на крвта.
Знаците и симптомите на апсцес на забот вклучуваат:
- Мошне болна и упорна забоболка;
- Чувствителност на топло и ладно;
- Чувствителност на џвакање и гризење;
- Треска;
- Отоци на лицето и образот;
- Отечени лимфни јазли под вилицата и во вратот;
- Ненадејна појава на непријатен здив и лош вкус на течноста во устата и престанок на болката ако апсцесот пукне.
Кога да се појде на забар?
Ако имате некакви знаци и симптоми на апсцес на забите, под итно морате да појдете на забар. Истото важи и ако имате температура или треска. Грозницата и отоците можат да значат дека инфекцијата се проширила подлабоко во вилицата и околните ткива или дури на други делови на телото. „Целта на стоматологијата е да се излекува забот и да не мора да се вади, но ако инфекцијата неповратно се проширила вадењето на забот понекогаш е единствена опција“, вели доктор Бурхен.
Причини за појава
Апсцесот настанува кога бактериите ќе ја нападнат забната пулпа – мек, внатрешен дел од забот кој содржи крвни жили, нерви и сврзни ткива. Бактеријата влегува низ кој било дел од забната шуплина или пукнатина во забот и се шири се до коренот. Бактериската инфекција предизвикува отекување и воспаление.
Природно лекување
Лекувањето на забниот апсцес главно се врши кај стоматолог со отворање на забот и испуштање на гнојот. Меѓутоа некои мерки можат да помогнат за побрзо пукање на апсцесот, па со само тоа и ослободување од притисокот и болките. Имајте на ум дека советите во продолжение не се замена за вистинско лекување, туку се применуваат исклучиво во консултација со стоматолог:
- Болките може да ги ублажите со аналгетик;
- Мијте ја устата со солена вода, тоа би можело да го забрза пукање на апсцесот, а водата ќе го измие и евентуалниот гној;
- Кокосовото масло, исто така, е ефикасно во елиминирањето на бактериите во усната шуплина;
- Чајот од жалфија се користи првенствено за испирање на усната шуплина, содржината не ја голтајте, туку плукнете ја;
- Ѓумбир – можете да џвакате парче ѓумбир или да маткате низ устата чај од ѓумбир;
- Пијте чај од нане или испирајте ја устата;
- Лукот има антибактериски својства кои можат да помогнат;
- Мраз – на болното место ставајте студени облоги.
КАКО ДА ГИ ЗАЧУВАТЕ ЗАБИТЕ ЗДРАВИ?
- Редовно одете на забар;
- Барем два пати на ден мијте ги забите со паста која содржи флуориди;
- Пијте и јадете помалку намирници кои содржат големи количества шеќер;
- Чистете го просторот меѓу забите со забен конец за храната да не остане заробена меѓу забите и забното месо.
