Оваа повеќегодишна билка е од семејството Asparagaceae. Се смета дека потеклото на аспарагусот е источниот Медитеран, но можно е да се најде и во дивините на подрачјето на Европа, Кавказ и западен Сибир. Аспарагусот е род од околу 300 видови. Дивиот аспарагус има поинтензивен вкус од оној кој се одгледува во градината.
По составот се разликуваат диви и одгледувани аспарагуси, бели и зелени. За исхрана се најдобрите дивите, бидејќи имаат најмногу витамини, а се сметаат за еден од најдобрите извори на фолна киселина и бета каротен. Се јадат свежи или конзервирани, а во фрижидер може да стојат до три дена.
Енергетска вредност
Енергетската вредност на 100 г аспарагус е само 35 калории, бидејќи 93 проценти е составен од вода, 1,7 проценти отпаѓа на протеини, 2,6 проценти јаглехидрати и 0,7 проценти масти. Аспарагусот, освен со витамини и минерали, особено калиум и калциум, е богат со многу вредни супстанции. Тој е одличен извор на витамин Б6, калциум, магнезиум и цинк и многу добар извор на влакна, протеини, витамини А, Ц, К и Е, тиамин, рибофлавин, рутин, ниацин, фолна киселина, железо, фосфор, калиум, бакар, манган и селен. Аминокиселината аспарагин го добила името по аспарагусот, бидејќи оваа билка изобилува со аспарагин.
Аспарагусот е сиромашен со калории, но е одличен извор на фолна киселина и калиум
Иако освен витамини не содржи многу хранливи материи, сепак, аспарагусот е познат антиоксидант. Флавоноидите од аспарагусот го продолжуваат дејството на витаминот Ц. Важно е да се знае структурата на билката за при подготовката на храната да не се отстранат биолошки вредните состојки. Аспарагусот е одлична поддршка на диетите.
Истражувањата за хранливата вредност на аспарагусот покажаа дека е сиромашен со калории, но, исто така, и дека е одличен извор на фолна киселина и калиум и антиоксиданти. Тоа го прави идеална храна за здравјето на срцето, а бидејќи е богат со калиум го чува и здравјето на коските, бидејќи го намалува губењето на калциумот од коските.
Се верува дека има благотворно дејство врз запекот, бидејќи е богат со влакна, а се користи и како облог против егзема и се препорачува на дијабетичари. Делува и како диуретик и помага при отежнато мокрење, како и при ублажување на менструалните проблеми. Го неутрализира амонијакот кој не прави уморни и ги штити малите крвни садови од пукање. Аспарагусот е еден од најбогатите извори на рутин, флавоноид кој го намалува холестеролот, го намалува крвниот притисок и ги зајакнува ослабените капилари.
Подготовка на аспарагус
По сечењето аспарагусот брзо се расипува, па важно е да се подготви свеж и додека е се уште тврд. Подготовката на аспарагусот е едноставна. Обично се подготвува сварен во солена вода, како супа или пржен со јајца. Ако сакате да го пржите: измијте го, отстранете го долниот тврд дел, а мекиот дел од стеблото исечкајте го на помали парчиња. Динстајте на масло на тивок оган четири до пет минути.
