На нашите очи им требаат солзи за да останат здрави и удобни. Ако нашите очи не произведуваат доволно солзи, тогаш настанува суво око. Суво око е, исто така, кога окото не го произведува вистинскиот тип на солзи или солзен филм. Со секое трепкање на очните капаци, солзите се шират низ предната површина на окото. Симптомите на суво око стануваат прогресивно проблематични и имаат зголемен товар за пациентите, бидејќи болеста напредува. Овие типови на пациенти имаат различен степен на оштетување на квалитетот на животот, можат да станат фрустрирани со нивниот третман, постојано да посетуваат лекари и специјалисти кои бараат алтернативни третмани.
Асс. д-р Христиан Дума
Солзите обезбедуваат подмачкување на окото, го намалуваат ризикот од инфекција на очите, ги мијат туѓите материи од окото и ја одржуваат површината на очите мазна и чиста. Солзите се произведуваат од неколку жлезди во и околу очните капаци. Солзниот филм е составен од три слоја: липиден, воден и слузен слој. Секоја компонента ја заштитува и ја храни предната површина на окото. Липидниот слој помага да се спречи испарувањето на водениот слој. А водениот слој има улога за донесување на атмосферскиот кислород на аваскуларниот епител на рожницата, има и антибактериска улога и коригира неправилности на предната површина на рожницата, додека слузниот слој ги распрснува солзите рамномерно над површината на окото одржувајќи ја неговата влажност. Најчестата форма на суви очи се јавува кога водениот слој на солзи е несоодветен. Оваа состојба, наречена кератоконјуктивитис сика (KCS), исто така, се нарекува и синдром на суво око. Луѓето имаат тенденција да прават помалку солзи додека стареат поради хормоналните промени. И мажите и жените можат да добијат суво око. Сепак, тоа е почеста појава кај жените – особено оние кои поминале низ менопаузата.
Кои состојби може да предизвикуваат суво око?
Возраста. Сувото око е дел од природниот процес на стареење. Поголемиот дел од луѓето над 65-годишна возраст доживуваат некои симптоми на суви очи.
Пол. Жените имаат поголема веројатност да развијат суви очи поради хормоналните промени предизвикани од бременоста, употребата на орални контрацептиви и менопауза.
Лекови. Одредени лекови, вклучувајќи антихистаминици, деконгестиви, бета блокатори, антидепресиви, диуретици може да го намалат производството на солза.
Здравствени состојби. Луѓето со автоимуни болести како ревматоиден артритис, Сјогренов синдром, лупус, дијабетес, со болести на тироидната жлезда имаат поголема веројатност да имаат симптоми на суви очи. Исто така, воспалението на очните капаци (блефаритис), воспаление на предната површината на окото, внатрешно или надворешно вртење на очните капаци може да предизвикаат појава на суви очи.
Начинот на живеење. Нередовно трепкање, како на пример, при долго работење на компјутер, гледање телевизија или при долго читање без одмор, исто така, може да придонесе до суво око. Потоа фактори кои се поврзани со средината во која живееме како сув воздух (климатизирани простории, радијатори), атмосферско загадување, изложеноста на чад и ветер може да резултира со суви очи.
Други фактори. Долгорочната употреба на контактни леќи, операциите за корекција на рефракцијата на окото, како што е LASIK, може да го намалат производството на солзи и да придонесат до суви очи.
Кога да се сомневаме дека имаме суви очи?
Луѓето со суви очи се жалат на печење, чувство како да имаат страно тело во окото, тежина, мукозен секрет кој го заматува видот, црвенило, иритација (посебно на загадени простории). Овие симптоми може да се влошуваат ако болеста не се дијагностицира и третира навреме со соодветен третман.
Како се третира суво око?
Третманот на синдромот на суво око се спроведува со помош на капки, наречени вештачки солзи. Ги има неколку врсти на вештачки солзи во вид на капки, гел или маст, со различен состав, кои ќе ви ги препише очен лекар, зависно од дисфункцијата на солзниот филм, дијагностицирана со специфични офталмолошки тестови и анализи.
Најважно е да сфатите дека суво око може да биде причина за многу непријатни субјективни чуства во очите и наместо да се трауматизирате , посетете очен доктор и започнете итен третман со вештачки солзи, што веднаш ќе ги ублажи проблемите и ќе ви овозможи очна и психичка удобност.
Совети за спречување на суво око
- Користете вештачки солзи, маст или густи капки за очи пред да спиете.
- Не заборавајте – редовно трепкајте кога читате или гледате на компјутер подолго време. Зголемете ја влажноста во воздухот на работа и дома. Останете подалеку од многу топли и загадени простории. Во зима, ставете вода во близина на вашиот грејач или радијатор за да се влажни воздухот.
- Масирајте ги вашите очни капаци.
- Употребувајте одредени средства за чистење на очните капаци.
- Обидете се да не користите фен за коса, ако е можно.
- Заштитете ги очите од сушење на ветер со очила.
- Избегнувајте да бидете дехидрирани. Пијте многу вода (8 до 10 чаши) секој ден. Разговарајте со вашиот офталмолог за додавање омега-3 масни киселини во вашата исхрана.
- Суво око може да биде хронична состојба, а пациентите кои не реагираат само на вештачки солзи ќе треба да преземат дополнителни чекори за третирање на нивните суви очи. Затоа се препорачува редовна контрола на очен лекар за да ги спречите можните сериозни компликации од сувото око, кои може сериозно да ви го оштетат видот.
