Најчести и најраспостранети гинеколошки проблеми кај женската популација се вагиналните инфекции (вагинити или колпити), кои се јавуваат од најрана до најстара возраст. Доколку не се лекуваат и третираат правилно може да доведат и до несакани последици – стерилитет, спонтани абортуси и предвремени породувања (кај бремени жени), воспаленија на карличните органи и системски пореметувања.
ТРИХОМОНИЈАЗА: Инфекции причинети со протозоа Trichomonas vaginalis. Понекогаш протекува како асимптоматска инфекција или како акутна со обилен воденест жолтозелен секрет, со многубројни пенести меурчиња, црвенило и со непријатна миризба. Кај мажите може да предизвика циститис и простатитис. Лекувањето се спроведува со препарати со Metronidazole, системски со таблети и локално со вагиналети кај жената и секогаш едновремено кај двата партнери.
ИНФЕКЦИИ СО ИНТРАЦЕЛУЛАРНИ БАКТЕРИИ: Група на инфекции кои се помеѓу вируси и бактерии и живеат интрацелуларно во клетките на грлото на матката (Chlamidia, Micoplasma, Ureaplasma). За нив се земаат специфични микробиолошки брисеви и имаат големо значење за фертилитетот и воспалителните заболувања на малата карлица. Лекувањето е со системски и локални антибиотици по антибиограм, секогаш кај двата партнери. Повторувањето на брисот по 45-60 дена, ќе го покаже ефектот од лекувањето и дали ќе треба и дополнителен третман.
ВИРУСНИ ИНФЕКЦИИ: Инфекциите со HSV-2 (генитален херпес) даваат многу драматична клиничка слика, проследена со локални и општи симптоми. Локалните симптоми одат со жарење и болка локално, проследена со меурчиња, чешање и оштетување на ткивото на вагината, вулвата и перинеумот. Системски може да се јави покачена телесна температура, малаксаност и изнемоштеност. Лекувањето е со виростатици, симптоматска терапија (за намалување на болките) и витаминотерапија.
Инфекциите со HPV вирусите (кои ги има преку 150 ниско и високоризични типови), се се пораспостранети сексуално преносливи вируси и се причина за интрацервикалните клеточни дисплазии познати како CIN промени и карцином на грлото на матката. Исто такви промени можат да предизвикаат и на клетките на вагината. Затоа многу е битна редовната контрола со ПАП тестови, кај сексуално активната женска популација и навременото откривање и лекување на промените предизвикани со HPV вирусите, во борбата против карциномот на грлото на матката.
Поретко од гениталните инфекции кај нас, се јавуваат и гонореата, сифилисот, СИДАта, Хепатитот Б и Ц. Сите овие инфекции спаѓаат во групата на сексуално преносливи болести и нивното откривање и навремен третман е многу значајно
За спречување, навремено откривање и лекување на вагиналните инфекции потребни се редовни гинеколошки контроли. Некои од инфекциите се детектираат со ПАП тестот (Candida, Trichomonas vaginalis, Gardnerella vaginalis…), а за другите се земаат специфични микробиолошки брисеви. Во зависност од добиените резултати, вашиот гинеколог ќе ви препише соодветна терапија (локална или системска), само за вас или и за вашиот партнер.
За да биде ефикасно лекувањето на вагиналните инфекции, секогаш треба да биде спроведено од стручно лице (гинеколог, микробиолог), а не на своја рака.
Редовните гинеколошки контроли, правилното сексуално однесување, хигиената, носењето на памучна облека, избегнувањето на користење хемиски агенси, правилната исхрана и здравите животни навики ќе ја намалат зачестеноста и бројот на вагиналните инфекции.
