Кај астигматизмот светлината не се прекршува еднакво на сите линии на окото. Оваа болест може да се јави самостојно или во комбинација со кратковидоста или далекувидоста. Астигматизмот во повеќето случаи е наследно пореметување. Најчест симптом на астигматизам е замаглениот вид, односно окото не може да создаде јасна слика и острината на видот е намалена. Пациентот ја гледа околината на посебен начин, односно круговите ги гледа во овален облик, а ако набљудува две линии едната секогаш ќе биде замаглена.
Исто така, пациентот често гледа и двојна слика и отежнато чита. За сето време вложува напор и се обидува да се прилагоди и да создаде појасна слика, а тоа често доведува до симптоми на слабост и замор на самото око.
Често доаѓа и до главоболка, вртоглавица и раздразливост. Се случува и пациентите да ја држат главата навалена на една страна како на тој начин би се намалила деформацијата на сликите. Меѓутоа, ова може кај децата да доведе до развој на крив ‘рбет.
Како и кај личностите кои патат од кратковидост и пациентите заболени од астигматизам при читањето текстот го држат мошне близу до очите. Меѓутоа, она што е карактеристично е тоа што луѓето со астигматизам подзамижуваат додека гледаат блиску и во далечина.
Децата кои патат од оваа болест обично тоа и не го знаат затоа што се навикнати на замаглен вид и никогаш не виделе јасна слика на некој предмет. Затоа е мошне важно редовно да одат кај офталмолог на преглд, за проблемот навреме да се открие и да се пристапи кон соодветна терапија.
Постојат различни видови астигматизам во зависност од причината. Најчест е корнеалниот астигматизам кој е последица на морфолошки изменета рожница, додека многу е поредок ленталниот кој настанува како резултат на промени кои се случуваат во очната леќа. Постои и ретинален астигматизам кој е предизвикан од пореметување на положбата во макулата како резултат на некои патолошки промени, како што се лузни или отоци.
