Австралија ја заостри политиката на вакцинација во земјата, воведувајќи месечна парична казна за родителите кои ќе одбијат да ги вакцинираат своите деца.
Според новите правила, родителите во Австралија ќе мора секој месец да платат 28 долари месечно за секое дете кое не е вакцинирано навреме.
Родителите кои не беа ажурни со вакцинацијата на децата досега губеа 737 долари од своите даночни олеснувања.
Новите санкции ќе доведат до приближно иста финансиска загуба за семејството, но со оглед на месечните плаќања, властите сакаат на овој начин да бидат постојан потсетник на родителите за потребата од вакцинација на децата. Оние кои заработуваат повеќе од 80 евра дневно ќе имаат и дополнителни казни.
Воведувањето на овие санкции е резултат на напорите на австралиските власти поради опаѓањето на бројот на децата под седум години, кои биле подложени на вакцинација во изминатите години.
Австралискиот министер за социјални работи Дан Техан изјавил дека санкциите се потребни за да се заштити здравјето на општеството.
„Вакцинирањето е најсигурниот начин да се заштитат децата од болести кои може да се спречат со вакцинација. Родителите кои не ги вакцинираат своите деца, ги ставаат во ризик од заболување од овие болести, подеднакво како и децата на другите луѓе“, изјавил Техан.
Светската здравствена организација во изминативе месеци ги охрабрува владите да инвестираат во напорите за имунизација, да ги стават вакцините како приоритет и бара од граѓаните да се вакцинираат себеси и своите семејства.
За потсетување, Австралија од минатата година почна да размислува и за забрана за запишување на невакцинирани деца во градинките.
