Истражување на група научници од Аврсталија открило дека јадењето еден портокал секој ден го штити видот и го одржува здравјето на очите. Според објавените тврдења, портокалот претставува еден вид на превенција од дегенерација на макулата. Дегенерацијата на макулата претставува еден од клучните офталмолошки проблеми на современото доба. Се јавува во неколку форми, а најчестата форма е во врска со популацијата на постарите луѓе и се нарекува сенилна макуларна дегенерација. Оваа болест може да доведе и до ослепување.
Спроведената студија покажа дека ризикот од појава на оваа болест е за 60 % помал кај лицата кои консумирале најмалку еден портокал дневно. Експертите од универзитетот во Сиднеј испитувањето го спровеле во период од 15 години со учество на над 2 000 испитаници над 50-годишна возраст.
Истражувањата за придобивките од портокалот досега првенствено биле правени за ефектот на неговата содржина, односно за ефектот на витамините А, Ц и Е врз очите. Ова е прва ваква студија која директно го поврзува портокалот со макуларната дегенрација.
Макуларната дегенерација главно ги напаѓа луѓето над 50-годишна возраст. Ризикот за создавање на сенилната макуларна дегенерација се зголемува со годините на живеење. Помеѓу популацијата од 65 до 75 години старост тој ризик изнесува 10-20 %. Во периодот од 75 дo 85 години ризикот изнесува 35 %.
