Научниците потврдија: бебињата растат побрзо додека спијат. Резултатите од истражувањето отвораат пат за подобро разбирање на врската помеѓу растот на бебето и спиењето, но, исто така, ги смируваат и загрижените родители поради променливите и непредвидливи потреби за спиење на нивните деца.
Сонот влијае на растот на децата, покажаа резултатите од истражувањето на група американски научници од Универзитетот Емори во Атланта
Тимот на научници предводени од д-р Мишел Ламп ја открија поврзаноста помеѓу бројот на часови на спиење на новороденчето и неговиот раст. Истражувањето кое траело помеѓу четири и 17 месеци било изведено на група деца кои на почетокот биле стари околу 12 дена, пренесоа француските медиуми. Забележано е дека децата растат повеќе ако се зголеми бројот на подолги периоди на спиење во текот на денот. Сепак, точната природа на поврзаноста помеѓу спиењето и растот на коските се уште не е утврдена.
Ламп истакна дека се работи за резултати кои се корисни за родителите, кои лесно може да се вознемират поради променливата и непредвидлива природа на спиење на нивните деца. Така, мајките и татковците ќе сфатат дека е неопходно да го пуштат детето да го следи сопствениот ритам.
